Жаҳон соғлиқни сақлаш ташкилоти (ЖССТ) етти ҳафтадан буён биринчи марта коронавирус инфекцияси билан касалланиш даражаси ўсганини қайд этди. Бу ҳақда бирифинг чоғида ташкилот бош директори Тедрос Аданом Гебрейесус маълум қилди, деб ёзади «РБК».
«Етти ҳафта ичида биринчи марта касалланиш ҳолатлари кўпаяётганини кўряпмиз», — деди ЖССТ раҳбари.
Унинг сўзларига кўра, коронавирусни юқтириш ҳолатлари Шимолий ва Жанубий Америкада, Европада, Жануби-Шарқий Осиёда ва Шарқий Ўртаер денгизида кўпайган.
ЖССТ маълумотларига кўра, ўтган ҳафта — 22—28 февраль кунлари дунёда COVID-19’га чалиниш билан боғлиқ 2,65 миллионта янги ҳолат аниқланган. Шуларнинг 1,12 миллионтаси Шимолий ва Жанубий Америкада, 1,05 миллиони — Европада, 171 мингтаси — Жануби-Шарқий Осиёда, 207 мингтаси — Шарқий Ўртаер денгизида, 50 мингтаси — Африкада қайд этилган.
Февраль охирида коронавирус билан касалланиш даражаси ўсиши мумкинлиги ҳақида АҚШ президенти Жо Байден айтиб ўтган эди. Унинг сўзларига кўра, янги беморларнинг кўпайиши вируснинг янги штаммлари пайдо бўлиши билан боғлиқ бўлиши мумкин.
Шунингдек, вирусни юқтириш ҳолатлари кўпайгани ҳақида Финляндия ҳукумати ҳам хабар берди. Мамлакатда фавқулодда ҳолат эълон қилиниб, ресторанлар ва мактаблар вақтинчалик ёпилди, ҳудудлараро ҳаракатланиш чекланди.
Аввалроқ ЖССТ дунё аҳолисининг 10 фоизидан камроғида COVID-19’га қарши антитана мавжудлигини маълум қилган эди.
ЖССТ маълумотларига кўра, дунёда коронавирусга чалинганлар сони 114 миллиондан ошган, шуларнинг 2,53 миллиони касалликдан вафот этган.
Изоҳ (0)