АҚШ Украинага 125 млн долларлик янги ҳарбий ёрдам пакетини ажратади

АҚШ Украинага янги ҳарбий ёрдам пакети сифатида 125 миллион доллар беришни режалаштирмоқда. Бу ҳақда Пентагон вакили Жон Кирби брифингда маълум қилди, деб ёзмоқда «РБК».

«Бугун АҚШ мудофаа вазирлиги Украина хавфсизлигига кўмак ташаббуси учун янги, 125 миллион долларлик ёрдам пакети берилишни эълон қилади», — деди Пентагон вакили.

Янги пакет Украинага «ҳудудий яхлитликни сақлашга, шунингдек, ўз чегараларини ҳимоя қилишни таъминлашга» ёрдам бериш мақсадида ишлаб чиқилган. Ажратилган маблағ «НАТО билан ўзаро ҳамкорликни» яхшилашга ҳам сарфланади.

Аввалроқ Пентагон раҳбари Ллойд Остин Украинанинг мудофаа вазири Андрей Таран билан телефон орқали мулоқоти чоғида АҚШ «Россия тажовузидан янада самарали ҳимояланиш» учун Украина Қуролли Кучлари қудратининг мустаҳкамланишидан манфаатдор эканини айтган эди. Бунгача у Украинани, «ўзини ҳимоя қилиш учун», қурол-яроғ билан таъминлашни ёқлаган.

2020 йил июль ойида АҚШ Сенатининг Ташқи алоқалар қўмитаси аъзолари Украинага ҳар йили 300 миллион долларлик ҳарбий ёрдам ажратилишини назарда тутувчи қонун лойиҳасини тақдим этган эди. Бундан ташқари, АҚШ Сенати 2021-молиявий йил (2020 йил, 1 октябрдан бошланган) учун мудофаа бюджети лойиҳасини маъқуллаган, у, шу жумладан, Украинага 250 миллион доллар миқдорида ҳарбий ёрдам ажратилишини кўзда тутади.

Аввалроқ Россия ва Сурия АҚШни жангариларга гуманитар ёрдам кўрсатишда айблагани ҳақида хабар берилганди. Унга кўра, гўёки Қўшма Штатлар БМТдан Рукбан қочқинлар лагери аҳолиси учун гуманитар ёрдам олиб, уни Вашингтон назорати остидаги жангариларга ўтказмоқда. Москва ва Дамашқ Вашингтонни «АҚШ босиб олган ҳудуд ва унинг ичида жойлашган Рукбан лагерида содир бўлаётган барча нарсалар» учун жавобгар қилди. Жавобгарликда, хусусан, Сурия ҳукумати назоратига қайтарилгунга қадар аҳолини сув, озиқ-овқат ва энг зарур нарсалар билан таъминлаш назарда тутилмоқда.