Коронавирус пандемиясининг иккинчи тўлқини ҳали тугамаган. Бу ҳақда Жаҳон соғлиқни сақлаш ташкилотининг (ЖССТ) Россиядаги вакили Мелита Вуйнович айтиб ўтди, деб ёзмоқда «РБК».
«Иккинчи тўлқин тугагани йўқ. Гарчи тўлқиннинг пасайиш кўрсаткичи яхши бўлса-да, айрим мамлакатларда унинг қайта кўтарилаётганига гувоҳ бўляпмиз, ҳатто биринчи тўлқиннинг эпидемиологик даражаларига ҳали эришилмаган», — деди Вуйнович.
ЖССТ вакилининг сўзларига кўра, кўплаб мамлакатлар аҳолиси ҳали ҳам «етарли иммунитетга» эга эмас. Вуйнович, шунингдек, ЖССТ пандемия билан боғлиқ эҳтиёткорлик ва хавфсизлик чораларини кўришга чақиришда давом этаётганини қўшимча қилди.
ЖССТ бош директори Тедрос Гебрейесуснинг айтишича, 1 март куни ташкилот етти ҳафта ичида биринчи марта COVID-19’га чалиниш ҳолати ортганини қайд этган. ЖССТ маълумотларига кўра, касалланиш ҳолатларининг кўпайиши Шимолий ва Жанубий Америка, Европа ва Жануби-Шарқий Осиёда кузатилган. Ўтган бир ҳафтанинг ўзида ташкилот инфекция юқтириш бўйича 2,6 миллиондан ортиқ ҳолатни қайд этган.
Жонс Ҳопкинс университетининг маълумотларига кўра, пандемия бошидан бери бутун дунёда коронавирусга чалинганлар сони 114,4 миллион кишини ташкил этган, 2,5 миллиондан ортиқ киши касалликдан вафот этган.
Аввалроқ Мелита Вуйнович агар одамлар эҳтиёт чораларига амал қилмаса, COVID-19 пандемиясининг учинчи тўлқини юз бериши мумкин, дея огоҳлантирган эди. «Жамоавий иммунитет ҳали етарлича шаклланмаган, инфекция тарқалишига ҳеч қандай тўсиқ йўқ. Эҳтиёт бўлмасак, учинчи тўлқин бошланиши мумкин. Бу одамларнинг хатти-ҳаракатларига боғлиқ», — дея изоҳлаган Мелита Вуйнович.
Январь ойида ЖССТ соғлиқни сақлаш бўйича фавқулодда вазиятлар дастури директори Майкл Райан коронавирусни тўлиқ мағлуб этиш қийин бўлишини айтган. У COVID-19 эндемик касалликка айланишини истисно қилмаган, унинг фикрича, вирусни бутунлай йўқ қилиш деярли имконсиз.
Изоҳ (0)