Туркманистон давлат товар-хом ашё биржасида президент автокарвонининг зирҳли машиналари яна бир бор чет элда сотиш учун савдога қўйилди. Бу ҳақда «Хроника Туркменистана» хабар берди.
Биржада жами олтита машина сотилади:
- 2001 йилда ишлаб чиқарилган иккита зирҳли Mercedes-Benz S600 — 48 500 долларга;
- 2009 йилда ишлаб чиқарилган зирҳли Bentley Cоntinental —75 500 долларга;
- 2010 йилда ишлаб чиқарилган зирҳли Cadillac STS — 7200 долларга;
- 2009 йилда ишлаб чиқарилган зирҳли Lexus LS460 L AWD — 40 000 долларга;
- 2006 йилда ишлаб чиқарилган зирҳли Mercedes-Benz S600L — 65 500 долларга.
Эслатиб ўтамиз, 2020 йил ноябрь ойида худди шу лотлар шу нархда фонд биржасига қўйилган. Шунингдек, март ойида ҳам қўйилган, аммо ўшанда улар орасида 2006 йилда ишлаб чиқарилган Mercedes-Benz S600L бўлмаган.
Маълумот учун, Туркманистон президенти Гурбангули Бердимуҳамедов нафақат наслдор отларни, балки қиммат автомобилларни ҳам юксак қадрлаши ҳақида хабар берилган. Бердимуҳамедовни Mercedes ва Maybach’дан ташқари Bugatti Veyron’ни бошқариб кетаётганида ҳам кўришган. 2010 йилда Top Gear журнали Veyron’га «Ўн йилликнинг энг яхши автомобили» мукофотини топширган. Айнан ўша йилда машина серияли ишлаб чиқариладиган дунёдаги энг тезкор автомобиль дея эътироф этилган.
Аввалроқ Туркманистон президенти 25 май — Ашхобод шаҳрининг юбилейи кунида туғилган биринчи ўғил болага Пайтагт (Пойтахт) ёки Ашхобод исмини, қиз болага эса Мержен (Маржон) ёки Май исмини қўйишни буюргани ҳақида хабар берилганди. Шунингдек, Бердимуҳамедов мустақилликнинг 30 йиллиги ва Ашхободнинг 140 йиллигини нишонлашнинг юқори ташкилий савиясини таъминлаш учун барча чораларни кўришни қатъий талаб қилган ва яқинлашиб келаётган тантаналар республиканинг таъсирчан ютуқлари ҳамда муваффақиятларини акс эттириши кераклигини таъкидлаган.
Изоҳ (0)