Ўзбекистонда Chevrolet Onix 9-12 минг доллар атрофида сотилиши кутилмоқда

Ўзбекистонда Chevrolet Onix автомобилини ишлаб чиқариш 2022 йил октябрь—декабр ойларида бошланиши кутилмоқда. Бу ҳақда UzAuto Motors компанияси бош директори вазифасини бажарувчи Рустам Ражабов маълум қилди, дея хабар бермоқда «Дарё» мухбири Мусулмонбек Иброҳимов.

Рустам Ражабовнинг маълум қилишича, «жаҳондаги энг харидоргир автомобиллардан бўлиб турган» Chevrolet Onix ҳозирги кунда халқаро бозорда 9-12 минг доллар атрофида сотилмоқда. «Ўзбекистонда ҳам тахминан шу нарх атрофида сотувга чиқарилади», — деди Ражабов.

Февраль ойида Ўзбекистонга синов учун Chevrolet Onix’нинг бир неча намунаси олиб келингани ҳақида хабар берилган эди. «Ушбу намуналар маҳаллий иқлим шароитларда синаш ва салоҳиятли харидорларнинг фикрини ўрганиш мақсадида харид қилинган», — дейилганди компания баёнотида.

Ўзбекистонда Chevrolet Onix ва янги авлод Chevrolet Tracker автомобиллари ишлаб чиқарилиши мумкинлиги ҳақида илк бор 2019 йил июнида маълум бўлган эди. Дастлабки режа бўйича, Onix’ни ишлаб чиқаришни маҳаллийлаштириш даражаси босқичма-босқич 60 фоизга етказилиши, унинг хориждан олиб келинадиган эҳтиёт қисмлари умумий қиймати (2019 йил июль ойи ҳолатига кўра) 2300 долларни, маҳаллий эҳтиёт қисмларининг умумий нархи эса 4200 долларга баҳоланаётган эди.

Компания 2019 йилги баёнотида 2020 йилдан Global Emerging Markets (GEM) ягона бюджет платформасида Chevrolet Onix седани ва бошқа бир қатор янги моделларни ишлаб чиқаришни йўлга қўйишини маълум қилган эди (қайд этиш жоиз, Chevrolet Tracker‘нинг янги авлоди ҳам GEM платформасида йиғилади — UzAuto Motors уни 2021 йил учинчи чорагидан бошлаб ишлаб чиқармоқчи).

Янги авлод Chevrolet Onix седанининг халқаро тақдимоти 2019 йил баҳорида Хитойда бўлиб ўтган, кейинроқ General Motors компанияси моделнинг эски авлоди анча талабгир бўлган Жанубий Америка бозори учун мўлжалланган алоҳида вариантини намойиш этган эди. Бразилия учун мўлжалланган Chevrolet Onix 2020 модели ўз номида махсус Plus қўшимчасини олган. Айнан шу минтақа учун моделнинг хетчбек кўриниши ҳам ишлаб чиқилган. Маълумотларга кўра, Бразилияда Chevrolet Onix Plus’нинг нархи 13,6 минг доллардан бошланади.

2020 йил ноябрь ойида Швейцариянинг Credit Suisse банки UzAuto Motors’га 150 миллион еврогача бўлган миқдорда кредит ажратиши маълум бўлган эди; компания ушбу кредит маблағларини инвестиция лойиҳаларини амалга оширишга, хусусан, General Motors’нинг GEM базасидаги янги моделларини ишлаб чиқаришни ўзлаштиришга йўналтириши кўзда тутилган.