Вашингтонда Ilani казиноси ўзининг очилишини ноодатий тарзда нишонлади: унинг раҳбарияти иккита еса бўладиган автомобиль ўртасида пойга уюштирган. Пойгада ғолиб бўлган болид-торт бирданига иккита рекорд ўрнатган — энг катта масофани босиб ўтган истеъмол қилишга яроқли дунёдаги энг тезкор машина, деб ёзади Motor.
Дунёга машҳур қандолатчи Майк Элдер бошчилигидаги тўққиз кишидан иборат жамоа ушбу машиналарни 46 соат давомида «тайёрлаган». Натижада оғирлиги 294 килограммга тенг оқ ва қора рангли торт-автомобиллар пайдо бўлган. Машиналар деярли тўлиқ истеъмол қилишга яроқли — 91 фоизга.
Бунга қадар хот-родларни яратишга ихтисослашган ательега эгалик қилган Элдер ўз «машиналари» учун асос сифатида алюминий шассидан фойдаланган. Ўқлари ва енгил ғилдираклари билан унинг оғирлиги 29,4 килограммни ташкил этган. Шундан сўнг, қандолатчилар жамоаси тортни қаватма-қават жойлаштириб чиқиб, унга шакл берган ва бўяган. Оқ автомобиль учун 139 бўлак тортдан фойдаланилган бўлса, қорасига 145 бўлак керак бўлган.
«Формула-1» пойгачиси Майкл Андретти иккала рекордни ўрнатган машинани бошқарган. Оқ автомобиль Андретти 1991 йилда Indicar сериясида иштирок этган болид кўринишида тайёрланган, қора эса унинг отаси Марионинг пойга автомобили нусхасига айланган.
Андреттининг автомобили истеъмол қилиш мумкин бўлган дунёдаги энг тезкор транспорт воситасига айланди — соатига 27,5 километр тезлик ва бу турдаги машиналар орасида энг узоқ масофани босиб ўтди — 107 метр. Шундан сўнг, ширин машина финишга етиб келган ва у тантанали равишда кесилиб, бошпанасизлар учун мўлжалланган хайрия ташкилотига топширилган.
Изоҳ (0)