Арманистон президенти мамлакат Қуролли Кучлари Бош штаби раҳбарининг истеъфосини маъқуллашни икки марта рад этди

Арманистон президенти Армен Саркисян иккинчи маротаба Пашиняннинг Қуролли Кучлар Бош штаби бошлиғи Оник Гаспарянни истеъфога чиқариш тўғрисидаги фармонини имзолашдан бош тортди, деб хабар қилди давлат раҳбари матбуот хизматига таяниб «РИА Новости».

Арманистон қонунчилигига мувофиқ, энди Пашинян фармони автоматик равишда кучга киради.

Арманистон президенти матбуот хизматининг таъкидлашича, Саркисян Арманистон Қуролли Кучлари Бош штаби бошлиғи Оник Гаспаряннинг ишдан бўшатилиши билан боғлиқ сиёсий инқирозни ҳал этилиши зарур деб ҳисоблайди.

Асосий қонунга кўра, президент уч кун ичида энг юқори қўмондонлик штати вакилини ишдан бўшатиш тўғрисида ариза берган бош вазирга ўз эътирозлари билан тегишли фармонни имзосиз қайтариши мумкин. Агар ҳукумат раҳбари ушбу эътирозларни қабул қилмаса, у ҳолда президент тегишли ҳужжатни имзолаши ёки Конституциявий судга мурожаат қилиши керак. Агар президент ушбу талабларни бажармаган бўлса, тегишли акт автоматик равишда кучга киради.

Таъкидланишича, Саркисян Конституциявий судда фармон лойиҳасининг ўзи эмас, балки Қуролли Кучларда кадрлар масаласини тартибга солувчи «Ҳарбий хизмат ва ҳарбий хизматчиларнинг мақоми тўғрисида»ги қонун-қоидаларига эътироз билдирган.

Тоғли Қорабоғдаги урушда мағлубиятга учрагач, Арманистонда сиёсий инқироз давом этмоқда. У 25 февраль куни бош штаб Никол Пашиняннинг истеъфосини талаб қилганидан кейин кучайди. Бунга бош вазир унинг Россия томонидан ишлаб чиқарилган «Искандер» ракеталари Қорабоғда самара бермагани ҳақидаги гапларини танқид қилган бош штаб бошлиғи ўринбосарини ишдан бўшатгани сабаб бўлди.

Пашинян унга «Искандер» ракеталари ҳақида нотўғри маълумот берилганини тан олди. Шу билан бирга, у ҳарбийларнинг хатти-ҳаракатларини давлат тўнтаришига уриниш деб атади ва Бош штаб бошлиғини ишдан бўшатишга уринди, аммо Арманистон президенти уни истеъфога чиқаришдан бош тортди. Пашинян Бош штаб раҳбарини «хоин» деб атаб, унинг кетишини талаб қилишда давом этмоқда. Ереванда 25 февралдан буён бош вазир тарафдорлари ва унга қарши бўлганларнинг акциялари бўлиб ўтмоқда.