Наманган вилояти Давлатобод туманида қалбаки дори воситаларини ишлаб чиқараётган яширин цех фаолиятига чек қўйилди, дея хабар бермоқда Бош прокуратура ҳузуридаги Департамент матбуот хизмати.
Қайд этилишича, Бош прокуратура ҳузуридаги Департамент ҳамда ИИБнинг Давлатобод тумани бўлимлари томонидан тезкор тадбир ўтказилган.
Унда фуқаро Р.А. ва бошқалар «Элхон» МФЙ ҳудудидаги уйида электр тармоғига ўзбошимчалик билан уланиб, қалбаки дори воситаларини («Меновазин», этил спирти, ёд ва яшил эритма) ишлаб чиқариш фаолияти билан шуғулланиб келаётганлиги аниқланган.
Ашёвий далил сифатида умумий қиймати 432,2 миллион сўмлик дори воситалари, турли хил ёрлиқ, кукун ва ускуналар олинган.
Мазкур ҳолат юзасидан Р.А. ва бошқаларга нисбатан Жиноят кодексининг 186-3-моддаси 3-қисми (кўп миқдорда сифатсиз ёки қалбакилаштирилган дори воситаларини ёхуд тиббий буюмларни ўтказиш мақсадида ишлаб чиқариш, тайёрлаш, олиш, сақлаш, ташиш ёки ўтказиш) билан жиноят иши қўзғатилиб, тергов ҳаракатлари ўтказилмоқда.
Бундан аввал Жиззахда магистрал йўл бўйида COVID-19 вирусини аниқловчи тест ва бошқа тиббий буюмларни ноқонуний сотаётган шахс ушлангани, Тошкент вилоятида 200 қути «Ремдесивир» дорисини жами 170 миллион сўмга сотган шахс қўлга олингани ҳамда Зангиотада қалбаки Persil, Ariel, Mif, Tide кир ювиш кукунлари ишлаб чиқараётган цех фош этилгани ҳақида хабар берилганди.
Изоҳ (0)