Самарқанд вилоятида 2019/2020-ўқув йили якунида мавжуд 1255 та умумтаълим мактабининг 142 тасини битирган битирувчиларнинг ҳеч бири олий таълим муассасасига ўқишга кирмаган. Бу ҳақда вилоят халқ таълим бошқармаси бошлиғи Зебинисо Шодиева маълум қилди, дея хабар берди «Дарё» мухбири.
Таъкидланишича, вилоятда битирувчилари ОТМга ўқишга кирган мактаблар сони бўйича Қўшработ тумани 29 та мактаб билан юқори натижани кўрсатган бўлса, Пастдарғом 19 та, Ургут 17 та, Пайариқ 15 та, Нуробод 14 та, Булунғур 13 ва Каттақўрғон тумани 10 та мактаб билан кейинги поғоналарни эгаллаган.
Ушбу 142 та мактаб директорининг 41 нафари огоҳлантирилиб, 48 нафарига ҳайфсан, 7 нафарига 30 фоиз интизомий жазо чораси қўлланилган. Қолган 45 нафари билан эса меҳнат шартномаси бекор қилинган.
«Бугунги кунда умумтаълим муассасаларида 56 370 нафар педагог-ходим фаолият олиб бормоқда. Уларнинг малакасини ошириш, олий, биринчи ва иккинчи тоифали ўқитувчилар сафини кенгайтириш бўйича ҳам амалдаги ҳуқуқий ҳужжатларимизга мувофиқ ишлар амалга оширилмоқда. Жумладан, Вазирлар Маҳкамасининг 2019 йил 13 майдаги қарорига асосан аттестация педагог кадрлар учун ҳар беш йилда бир марта ёки педагогларимизнинг ёзма аризаларига биноан навбатдан ташқари аттестациядан ўтказилиши мумкин. Бу янгилик ўз натижасини кўрсатмоқда. Сўнгги уч йил оралиғида олий тоифали ўқитувчиларимиз 809 нафардан 1278 нафарга ёки 1,6 фоиздан 2,3 фоизга кўпайди. Жорий йилда бу кўрсаткични 4 фоизга чиқаришни мақсад қилганмиз. Бу борада кенг имконият яратилганидан сўнг худди шундай биринчи ва иккинчи тоифали ўқитувчиларимиз сони ҳам ортиб, нафақат уларнинг моддий рағбати, балки ўз-ўзига талабчанлиги ҳам ортиб бормоқда», — дейди бошқарма бошлиғи Зебинисо Шодиева.
Изоҳ (0)