Ислом Каримов номидаги Фарғона вилоят театр-концерт саройида 27 февраль куни Халқ депутатлари вилоят, шаҳар ва туман кенгашларининг Олий Мажлис Сенати аъзоси сайлови бўйича қўшма мажлиси бўлиб ўтди. Мажлисда Сенат аъзоларини сайлаш масаласи кўриб чиқилди деб, хабар берди «Дарё» мухбири Азизжон Эрматов.
Марказий сайлов комиссиясининг 2021 йил 23 февралдаги қарорига асосан ўтказилган мажлисда халқ депутатлари вилоят, туман ва шаҳар Кенгашларининг 603 нафар депутати иштирок этган. Мажлис кун тартибига Фарғона вилояти бўйича бўшаб қолган иккита ўринга Олий Мажлис Сенати аъзоларини сайлаш масаласи киритилган.
Шаҳар-туман кенгашлари депутатларидан иборат маслаҳат кенгаши қўшма мажлис муҳокамасига 2-Мирзо Улуғбек сайлов округидан халқ депутатлари вилоят кенгаши депутати, вилоят ҳокими Хайрулло Бозоров номзодини, 31-Қува сайлов округи бўйича вилоят кенгаши депутати, вилоят она ва бола скрининг маркази директори Манзура Салимова номзодини яширин овоз бериш учун бюллетенга киритишни таклиф қилди. Мазкур таклиф маъқулланди ва яширин овоз бериш йўли билан Олий Мажлис Сенати аъзоларини сайлаш бўйича сайлов ўтказилди.
Шундан сўнг саноқ комиссиясининг ҳисоботи тингланди. Унга кўра, Фарғона вилояти, туман ва шаҳар кенгашлари депутатларининг кўпчилик овози билан Хайрулло Бозоров ва Манзура Салимова Олий Мажлис Сенати аъзолари этиб сайланди. Депутатлар овоз бериш натижаларини тасдиқлади.
«Билдирилган катта ишонч учун миннатдорлик билдираман. Бор кучим, бор ғайратим, бор билимим билан Фарғона вилоятига, халқимизга хизмат қилишга ваъда бераман. Бирликда, ҳамжиҳатликда иш олиб борсак халқимизни рози қиламиз», — деди Хайрулло Бозоров.
Изоҳ (0)