26 февраль куни АОКАда Мудофаа вазирлиги мутасаддилари иштирокида ўтказилган матбуот анжуманида муддатли ҳарбий хизматга кетувчилар коронавирусга қарши эмланиш-эмланмаслигига аниқлик киритилди.
«Ҳозиргача фақат муддатли ҳарбий хизматга кетувчиларда коронавирусни аниқлаш учун тест синовидан ўтказиш, текшириш амалга оширилади. Уларни вакциналар билан эмлаш ҳали йўлга қўйилгани йўқ», — деб жавоб берган ўсмирлар ва чақирилувчи ёшларга тиббий ёрдамни ташкил этиш маркази вакили.
Унинг айтишича, агар муддатли ҳарбий хизматга кетувчилар текширувдан ўтказилганда уларда тест натижалари манфий бўлса, ҳарбий хизматга қўйилади. Аммо вакцина билан эмланмайди.
Эслатиб ўтамиз, Ўзбекистонда коронавирусга қарши эмлаш март ойининг биринчи ярмида бошланиши маълум қилинган. Биринчи навбатда касаллик юқиш хавфи юқори бўлган кишилар: 65 ёшдан катталар, тиббиёт ходимлари, сурункали касалликлар билан диспансер назоратида турадиганлар, Қуролли кучлар ва ҳуқуқни муҳофаза қилиш органлари ходимлари, журналистлар, блогерлар, ОАВ ходимлари, транспорт ходимлари (метро, темир йўл, аэропорт), мактабгача таълим ташкилотлари ва мактабларда хизмат қилаётган ходимлар, чет давлатларда таҳсил олувчи талабалар ва меҳнат мигрантлари эмланади.
Ижтимоий ҳимояга муҳтож, ёши катта ва аҳолининг бошқа заиф қатлам вакилларини эмлаш бепул амалга оширилади.
Махсус комиссия қарорига кўра, Ўзбекистонда Россиянинг Гамалея илмий-тадқиқот маркази томонидан ишлаб чиқилган «Спутник V» вакцинасини қўллашга рухсат берилди. Коронавирусга қарши курашиш тадбирлари ва вакцина учун 3 триллион сўм ажратиш режалаштирилган.
Изоҳ (0)