Farg‘ona viloyati hokimi Xayrullo Bozorov O‘zbekistonning anklav hududi — So‘x tumaniga tashrif buyurib, aerodrom qurilishi jarayonini ko‘zdan kechirdi, deb xabar beradi Sputnik.

Foto: Sputnik

“Prezidentimiz alohida topshiriq berdilar, meni nomimdan so‘xliklarga salom aytasan, yuragim to‘ridagi tilaklarimni yetkazasan dedilar”, — deya so‘z boshlagan hokim.

Foto: Sputnik

“Bu hali boshlanishi. Hali ko‘rasizlar, yaqinda vertolyotlar, kichik samolyotlar Farg‘ona, Qo‘qon tomonlarga qatnashni boshlaydi. Mana, qurilishni boshlaymiz va xudo xohlasa, olti oyda bitkazamiz”, — deya va’da bergan hokim.

Xayrullo Bozorov, shuningdek, So‘xga tadbirkorlikni, sanoatni, ishlab chiqarishni olib kirib rivojlantirish uchun Prezident mutasaddi rahbarlarga So‘xda alohida soliqdan imtiyozga ega zonani tashkil qilish topshirig‘ini berganini aytib o‘tgan. Bunda barcha soliqlar 1 foizga keltirilishi ko‘zda tutilgan.

Eslatib o‘tamiz, O‘zbekiston Prezidentining “So‘x tumanini kompleks ijtimoiy-iqtisodiy rivojlantirish chora-tadbirlari to‘g‘risida”gi qarori bilan tumanda Farg‘ona viloyati hokimligi So‘x tumani “Novobod” mahalla fuqarolar yig‘ini hududida salkam 10 gektar yerda aerodrom barpo etilishi belgilangan.

Foto: Sputnik

Ayni damda tuman markaziga tutash hududda aerodrom qurilishi boshlab yuborilgan. Buning uchun davlat budjetidan 6,5 milliard so‘mdan ortiq mablag‘ ajratilgan.