Баҳрайн ҳукумати 25 февраль, пайшанба куни дунёда биринчи бўлиб фавқулодда ҳолат тартибига кўра COVID-19 коронавирус инфекциясига қарши бир дозали Johnson & Johnson вакцинасидан мамлакатда фойдаланишга рухсат берди. Бу ҳақда Associated Press хабар берди.
Мамлакат назорат идораларининг баёнотига кўра, препарат COVID-19’дан жиддий зарарланишнинг хавфини камайтиради ва ҳимояни таъминлайди. Экспертларнинг қайд этишича, улар компания тақдим қилган барча ҳужжатларни, жумладан, вакцинанинг клиник синовлари ҳақидаги ахборотларни ўрганиб чиққан.
Ҳукумат вакцина билан, аввало, аҳолининг заиф қатламлари, хусусан, ёши кекса инсонлар ва сурункали касаллик билан оғриётган беморлар эмланишини маълум қилди.
Бироқ Associated Press’нинг ёзишича, Johnson & Johnson вакцинасининг дастлабки партияси Баҳрайнга қачон етказиб берилиши ҳанузгача номаълум бўлиб турибди. Аввалроқ Баҳрайнда Россиянинг «Спутник V» вакцинаси, Pfizer-BioNTech ва AstraZeneca, шунингдек, Хитойнинг Sinopharm компанияси вакциналаридан фойдаланишга рухсат берилганди.
Айни вақтда Johnson & Johnson вакцинасидан фойдаланиш бўйича ўрганишлар АҚШ, Европа ва ЖССТда давом этмоқда. АҚШ Озиқ-овқат маҳсулотлари ва медикаментлар санитар назорати бошқармаси (FDA) 26 февралдан бошлаб вакцинадан фойдаланишга рухсат бериши мумкин.
Январь ойида Johnson & Johnson вакиллари вакцинанинг COVID-19’га қарши самарадорлик кўрсаткичи юқори экани, битта доза касалликдан 66 фоиз эҳтимол билан ҳимоя қила олишини таъкидлаб ўтганди. 2021 йил охиригача компания томонидан, тахминан, 1 миллиард доза ишлаб чиқарилиши режалаштирилган, дейилади AP хабарида.
Баҳрайнда пандемия бошланганидан бери жами 119 585 та касаллик юқтириб олиш ҳолати кузатилган, 437 нафар бемор инфекция асоратлари оқибатида ҳаётдан кўз юмган. Бироқ шунга қарамай Баҳрайн коронавирусга қарши аҳолисини эмлаш кўрсаткичи бўйича бутун дунёда етакчи давлатлар қаторида бормоқда.
Изоҳ (0)