Арманистон бош штаби 25 февраль санасида бош вазир Никола Пашиняндан истеъфога чиқишни талаб қилди. Бу штаб раҳбарининг биринчи ўринбосари Тиран Хачатряннинг ишдан олинишига жавоб ҳаракати бўлди. Хачатрян Россиянинг ‘Искандер’ ракета комплекслари самарасизлиги ҳақида билдирган танқидий фикрларидан кейин Пашиняннинг таклифига кўра лавозимидан озод қилинди. Бош штаб Хачатряннинг четлатилиши узоқни ўйламай, асосланган сабабларни келтирмасдан қилингани, қарор ҳиссиётга берилган ҳолда, шошмашошарлик билан чиқарилганини қайд этган. Пашинян ва унинг ҳукумати холис ечим топмагани штаб баёнотида таъкидлаб ўтилган. Ҳужжатга 40 нафар юқори лавозимдаги ҳарбий, хусусан, идора раҳбари Оник Гаспарян имзо чеккан. Meduza ракета комплекслари туфайли юзага келган сиёсий инқироз ҳақидаги маълумотларни тақдим этди.
Пашинян бош штабнинг баёнотини мамлакатда давлат тўнтаришини амалга оширишга бўлган уриниш деб атаган. У Арманистон президенти Армен Саркисянга штаб раҳбарини ишдан олишни таклиф қилди, бироқ президент ҳали мазкур таклиф бўйича фармонга имзо қўймаган. Шунингдек, Пашинян ўз тарафдорларидан Ереван марказидаги Республика майдонида тўпланишни сўраган. Бош вазирнинг ўзи ҳам кўчага чиқиб, оломон орасида бўлган. У мамлакатдаги вазиятни назорат остига олиш имкони ҳали борлиги ва генераллар штабининг баёноти «эмоционал реакция» эканлигини билдирган, лавозимини тарк этган ҳарбий раҳбарлар ватаннинг содиқ фарзандлари, қўриқчилари бўлиб қолишини таъкидлаган. Арманистон Бош прокуратураси штабнинг ушбу ҳаракатини конституцияга зид ҳолат деб баҳолаган. Президент инқирозни бартараф қилиш юзасидан тегишли чоралар кўрилиши ҳақида ваъда берган.
Арманистоннинг News нашри мамлакат полициясининг 30 нафар офицери бош вазир истеъфосини қўллаб-қувватлагани ҳақида хабар берган. Нашр эълон қилган рўйхатда полковник ва подполковник унвонларига эга зобитлар, шунингдек, беш нафар генерал ҳукумат раҳбарининг истеъфога чиқишини исташи ойдинлашган.
Ереван марказида Пашинян тарафдорларидан ташқари, унга қарши чиқаётганлар ҳам намойиш ўтказган. «Ватанни қутқариш учун ҳаракатлар» мухолифат партияси Озодлик майдонида митинг ўтказган. Мамлакатнинг иккинчи президенти Роберт Кочарян (1998—2008 йилларда Арманистонни бошқарган) ва учинчи президент Серж Саргсян (2008—2018 йилларда Арманистон давлат раҳбари бўлган) бошчилигидаги Арманистон Республика партияси ҳарбийларни қўллаб-қувватлаган. Кочарян Тоғли Қорабоғдаги урушда ютқазган ва ерларни бой берганлар ҳукуматдан кетиши лозимлигини маълум қилди. Парламент мухолифати — «Ривожланаётган Арманистон» ва «Нурли Арманистон» партиялари ҳам Пашинянга қарши чиққан.
Мухолифат тарафдорлари Арманистон парламент биноси яқинида чодир тикишни бошлаб юборган.
Арманистон бош вазири 23 февраль куни ‘Искандер’ларнинг жанговарлик хусусиятига шубҳа билан қараши ҳақида ‘1in’ нашрига интервью берганди. У собиқ президент Серж Саргсяннинг Арманистон Тоғли Қорабоғдаги урушнинг дастлабки кунлариданоқ «Искандер» қуролларидан фойдаланиши зарур бўлгани ҳақидаги фикрларига жавоб қайтарган.
«Балки Саргсяннинг ўзи нима учун душманга йўналтирилган ‘Искандер’ ракеталарининг портламагани ёки атиги 10 фоизигина фаоллашгани юзасидан жавоб берар», — дея киноя қилган Пашинян.
Қорабоғ учун уруш вақтида Арманистон миллий қаҳрамони унвонига муносиб кўрилган генерал Тиран Хачатрян эса Пашиняннинг ушбу сўзлари устидан кулган. У бош вазирнинг ‘Искандерлар’ ҳақидаги баёнотига «Ереван. Сегодня» нашри орқали муносабат билдирган. Ҳарбий узоқ вақт кулган ва бу имконсиз экани, баёнотни жиддий қабул қилиб бўлмаслигини айтган.
«Ким нима деганини билмайман, бироқ бундай бўлмайди, бу имконсиз», — дея генерал кулиб айтган сўзларини келтирган «Ереван. Сегодня».
Арманистон — Россиядан ‘Искандер’ ракета комплексларини харид қилган ягона мамлакат. Арманистон қуроллари орасида тўртта ракета созланмаси мавжуд. Аввал уларнинг Озарбайжонга қарши Тоғли Қорабоғ учун урушда ишлатилиши хабар қилинганди. ‘Искандер’ Россиянинг сўнгги авлод қуролларидан бири ҳисобланади, шу сабабли ҳам Россия учун халқаро майдонда мазкур қуролга билдирилган муносабат муҳим, деб ёзган «Ереван. Сегодня». Россия президентининг матбуот котиби Дмитрий Песков Пашиняннинг гапларига изоҳ беришни истамаган ва Россия ҳарбий техникаси ўз самарадорлигини бир неча марта исботлаганини эслатиб ўтган. Песков Арманистонда вазият кескинлашиб бораётганидан хавотирда эканлигини ҳам таъкидлаган.
«Пашинян гапирган гаплар англашилмовчилик». Россия Мудофаа вазирлиги ҳам Арманистон бош вазирининг ‘Искандерлар’ ҳақидаги фикрига муносабат билдирган.
Бу Арманистонда Пашинянга қарши биринчи марта ўтказилаётган норозилик намойишлари эмас. 2020 йил ноябрь ойида Тоғли Қорабоғ уруши тўхтатилиб, ҳудуд Озарбайжонга берилиши келишилганидан буён бош вазирнинг раҳбарлик курсиси қимирлаб қолган. Ноябрда Ереванда Пашинян истеъфосини талаб қилиб, норозилик намойишлари ўтказилган. Намойишчилар ҳукумат ва парламент биносига бостириб кириб, бош вазир резиденциясини шип-шийдам қилиб кетди. Пашинян ўшанда муаммони ҳал этишда Тоғли Қорабоғдаги урушни тўхтатишдан бошқа муқобил ечим кўрмаганини билдирган.
Изоҳ (0)