McDonald’s корпорацияси энг кам иш ҳақини соатига 15 долларга кўтариш тарафдори бўлган ишчиларнинг маълумотини йиғувчи махсус махфий разведка бўлинмасини ташкил қилди. Раҳбарлар бундай ходимларни компаниянинг хавфсизлигига таҳдид деб билади ва шунинг учун бир неча йиллардан буён уларнинг орқасидан жосуслик қилиб келади, деб ёзмоқда Vice нашри олиб борилган тергов натижаларига асосланиб.
McDonald’s ишчиларининг ўз касаба уюшмаси йўқ, аммо уларнинг кўпчилиги 2012 йилдан бери АҚШ ва бошқа мамлакатларда тез тайёрланувчи овқат ишлаб чиқарувчилари ишчиларининг 15 доллар учун кураш (Fight for $15) деб номланган ҳаракатида иштирок этади. Ҳаракат Америка маъмурияти ва бизнесменларидан 10 йилдан ортиқ вақт давомида ўзгармай келаётган иш ҳақи — соатига 7,25 долларни оширишни сўрамоқда.
Vice нашрининг таъкидлашича, ҳаракат сабаб АҚШ Конгресси соатига 15 доллар миқдорида федерал энг кам иш ҳақини тасдиқлаши мумкин. Бир қатор штатларда, хусусан, Калифорния, Нью-Йорк, Массачусетс, Иллинойс ва Мэрилендда маҳаллий ҳокимият бу талабларни қондирди.
Шу билан бирга, ҳаракатнинг кўплаб фаоллари McDonald’s франшизаларида ишлайди, шунинг учун компаниянинг ўзи улар расмий равишда унинг ходимлари эмаслигини айтиб, улар билан музокаралар олиб боришдан бош тортмоқда.
Шунга қарамай, Чикаго ва Лондондаги офисларда жойлашган разведка бўйича таҳлилчилар гуруҳи бутун дунё бўйлаб 15 доллар учун кураш ҳаракатини кузатмоқда. Разведка McDonald’s компаниясининг қайси ходимлари ҳаракат фаоллари эканлигини, иш ташлашлар ва норозилик намойишлари уюштириши ёки маҳаллий касаба уюшмаларини ташкил этиш учун ҳаракат қилишини аниқлайди.
Нашрдаги ҳужжатларга кўра, McDonald’s махфий бўлинмасининг мақсади — компаниянинг «контрагентлари» ва бизнеснинг жиддий равишда бузилишига олиб келадиган ҳамда инвестицияларнинг рентабеллигига таъсир қилиши мумкин бўлган мураккаб бозорлардаги қийин сиёсий шароитлар тўғрисида сиёсий маълумотларни тўплаш.
Бундан ташқари, компания «қандай қилиб ва қаерда 15 доллар учун кураш (McDonald’s) брендга хавф туғдириши» ёки «15 доллар учун кураш 2020 йилги мақсадларини қандай амалга ошираётганини» кузатиб боради.
«Уларнинг мақсади фаолларнинг стратегиясини аниқлаш, унга қарши тура олиш ва асосий ўйинчилар қаерда эканлигини ҳамда яна кимлар бу ҳақда билишини аниқлаш», — дейди корпорациянинг собиқ ходими.
McDonald’s вакили Vice нашрига журналистлар айтган воқеа ёлғон маълумот билан тўлдирилган, турли хил қисмларни бирлаштириб, нотўғри ва чалғитувчи шов-шувли хабар яратиш учун тўқиб чиқарилганини айтди.Бироқ McDonald’s вакили компания фаолият юритаётган дунёнинг 40 мингга яқин жойларида жамоага, франчайзингчиларга ва мижозларга зарар етказиши мумкин бўлган ҳар қандай хавфсизлик таҳдидларини аниқлашга йўналтирилган гуруҳ борлигини инкор этмади.
«Биз компания ишига халақит беришни мақсад қилган ходимларнинг норозилик ҳаракатларини кузатиб боришга мажбурмиз, бу ходимлар ва мижозларнинг хавфсизлигига зарар етказиши мумкин», — дея қўшимча қилди корпорация вакили.
Бундан аввал McDonald’s беш йил ичида биринчи марта қадоқлар дизайнини ўзгартириши ҳақида хабар берилганди.
Изоҳ (0)