Bahrayn hukumati 25-fevral, payshanba kuni dunyoda birinchi bo‘lib favqulodda holat tartibiga ko‘ra COVID-19 koronavirus infeksiyasiga qarshi bir dozali Johnson & Johnson vaksinasidan mamlakatda foydalanishga ruxsat berdi. Bu haqda Associated Press xabar berdi.
Mamlakat nazorat idoralarining bayonotiga ko‘ra, preparat COVID-19’dan jiddiy zararlanishning xavfini kamaytiradi va himoyani ta’minlaydi. Ekspertlarning qayd etishicha, ular kompaniya taqdim qilgan barcha hujjatlarni, jumladan, vaksinaning klinik sinovlari haqidagi axborotlarni o‘rganib chiqqan.
Hukumat vaksina bilan, avvalo, aholining zaif qatlamlari, xususan, yoshi keksa insonlar va surunkali kasallik bilan og‘riyotgan bemorlar emlanishini ma’lum qildi.
Biroq Associated Press’ning yozishicha, Johnson & Johnson vaksinasining dastlabki partiyasi Bahraynga qachon yetkazib berilishi hanuzgacha noma’lum bo‘lib turibdi. Avvalroq Bahraynda Rossiyaning “Sputnik V” vaksinasi, Pfizer-BioNTech va AstraZeneca, shuningdek, Xitoyning Sinopharm kompaniyasi vaksinalaridan foydalanishga ruxsat berilgandi.
Ayni vaqtda Johnson & Johnson vaksinasidan foydalanish bo‘yicha o‘rganishlar AQSh, Yevropa va JSSTda davom etmoqda. AQSh Oziq-ovqat mahsulotlari va medikamentlar sanitar nazorati boshqarmasi (FDA) 26-fevraldan boshlab vaksinadan foydalanishga ruxsat berishi mumkin.
Yanvar oyida Johnson & Johnson vakillari vaksinaning COVID-19’ga qarshi samaradorlik ko‘rsatkichi yuqori ekani, bitta doza kasallikdan 66 foiz ehtimol bilan himoya qila olishini ta’kidlab o‘tgandi. 2021-yil oxirigacha kompaniya tomonidan, taxminan, 1 milliard doza ishlab chiqarilishi rejalashtirilgan, deyiladi AP xabarida.
Bahraynda pandemiya boshlanganidan beri jami 119 585 ta kasallik yuqtirib olish holati kuzatilgan, 437 nafar bemor infeksiya asoratlari oqibatida hayotdan ko‘z yumgan. Biroq shunga qaramay Bahrayn koronavirusga qarshi aholisini emlash ko‘rsatkichi bo‘yicha butun dunyoda yetakchi davlatlar qatorida bormoqda.
Izoh (0)