Pfizer ва BioNTech фармацевтика компаниялари 25 февраль, пайшанба куни коронавирусга қарши вакцинанинг учинчи дозаси самарадорлиги ва хавфсизлиги бўйича синовлари бошланганини эълон қилди. Бу ҳақда «РИА Новости» хабар қилди.
Тадқиқот вакцина коронавируснинг янги вариантларига қарши курашидаги таъсирини ўрганиш учун олиб борилмоқда.
«Pfizer ва BioNTech бугун ўзининг коронавирусга қарши вакцинаси (BNT162b2) учинчи дозасининг хавфсизлиги ва иммуногенлигини баҳолаш учун синовлар бошлаганлигини эълон қилади», — дейилади Pfizer веб-сайтидаги баёнотда.
Таъкидланишича, синов жараёни икки ёш гуруҳидаги — 18 ёшдан 55 ёшгача ва 65 ёшдан 85 ёшгача бўлган камида 144 иштирокчини қамраб олади. Вакцинанинг учинчи дозасини икки марта эмланганлар қабул қилади. Уларнинг аҳволи тўғридан-тўғри препаратнинг учинчи дозасини олиш пайтида, бир ҳафта ўтгач ва бир ой ўтгач ўрганилади. Шифокорлар синов жараёнида иштирок этган одамларни икки йил давомида кузатади.
Бундан аввал Microsoft асосчиси Билл Гейтс янги штаммлар туфайли коронавирусга қарши вакцинанинг учинчи дозаси керак бўлиши мумкинлигини маълум қилган эди.
Изоҳ (0)