АҚШнинг халқаро таълим дастурларини тарғиб қилишга ихтисослашган American Councils ташкилоти Ўзбекистонга мингга яқин ўқитувчиларни юборишни режалаштирмоқда. Бу ҳақда Халқаро таълим бўйича Америка Кенгашларининг катта вице-президенти Майкл Кертис Ўзбекистоннинг Вашингтондаги дипломатик ваколатхона раҳбари Жавлон Ваҳобов билан ўтказган музокараларда маълум қилган.
«Халқ сўзи online» Ўзбекистоннинг АҚШдаги элчихонасига таяниб хабар беришича, учрашув давомида томонлар ташкилотнинг Ўзбекистондаги таълим дастурларини амалга ошириш бўйича жорий фаолиятини, мамлакатдаги таълим лойиҳаларини амалга оширишнинг истиқболли йўналишларини, шунингдек, Республикада инглиз тилини ўқитиш сифатини оширишга American Councils’ни жалб этишни муҳокама қилган.
Жавлон Ваҳобов Ўзбекистон бўйлаб мактаб ва университетларда дарс бериш учун АҚШдан 27 нафар инглиз тили ўқитувчиси ва олимлардан иборат дастлабки гуруҳ юборилгани учун миннатдорчилик билдирган.
Майкл Кертис фаол ҳамкорлик учун ўз миннатдорчилигини билдирган ва American Councils Ўзбекистоннинг мамлакатдаги кадрлар салоҳиятини ва ёш авлод билимларини сифат жиҳатидан оширишга қаратилган саъй-ҳаракатларини қўллаб-қувватлашга тайёр эканлигини таъкидлаган. Унинг айтишича, Ўзбекистонга қўшимча равишда мингга яқин ўқитувчилар юборилиши режалаштирилган.
Бундан ташқари, айни пайтда Ўзбекистонда АҚШ ҳукумати томонидан молиялаштириладиган ўндан ортиқ таълим дастурлари амалга ошириш босқичида турибди. Улар орасида Future Leaders Exchange, University Partnership in Central Asia, English Speaking Nation, ESN Teacher Coaches Program, U.S. Central Asia Education Fund, US-CAEF Alumni Conference 2021, American Windows Uzbekistan, Faculty Enrichment Program, Young Professional Internships, Uzbekistan Business Leaders, Afghanistan University Student Exchange Program, Open World Leadership Center Program, Uzbekistan Youth Leadership Conference 2021 кабилар бор.
Ўзбекистонда English Speaking Nation дастури ўтган йилнинг март ойида ишга туширилган эди. Уч йил давомида 15 мингдан ортиқ ўқитувчилар тренингдан ўтади.
Хабарда айтилишича, музокаралар якуни бўйича томонлар 2021—2022 йилларда Ўзбекистон фуқаролари учун таълим лойиҳалари соҳасида грант кўмагини ошириш, 2022 йил охиригача республика ҳудудида таълим ярмаркасини ташкил этиш каби икки томонлама ҳамкорликни кенгайтиришга келишиб олди. АҚШнинг етакчи университетларини жалб қилган ҳолда инглиз тили (TOEFL) ва бошқаларни билиш бўйича тест марказларини кенгайтириш режалаштирилган.
American Councils — АҚШнинг нотижорат ташкилоти бўлиб, маданий алмашинув, тил тайёргарлиги ва профессионал ривожланишни ошириш орқали халқаро таълим дастурларини тарғиб қилишга ихтисослашган. Ташкилот дунёнинг 90 мамлакатида лойиҳаларни амалга оширади. Бугунги кунга қадар 94 мингдан ортиқ битирувчилар, жумладан, миллий етакчилар, вазирлар, парламент аъзолари, элчилар ва етакчи компания ва корхона раҳбарлари American Councils’нинг таълим дастурларида муваффақиятли иштирок этган.
Ушбу нодавлат ташкилот 2018 йилда ўз ишини Ўзбекистонда давом эттирди ва ҳозирги кунда мамлакатда таълимни ривожлантириш бўйича умумий қиймати 50 миллион долларлик грант шартномасини амалга оширишда иштирок этмоқда.
Изоҳ (0)