Қўқон шаҳрида Миллий гвардия, ИИО ФМБ ва ДХХ масъул ходимлари ҳамкорлигида ўтказилган тезкор тадбирда ўзи билан ишқий муносабатда бўлган ҳолати туширилган видео тасвирларни тарқатмаслик эвазига фуқародан пул талаб қилган аёл қўлга олинди. Бу ҳақда Миллий гвардия матбуот хизмати хабар берди.
Маълум қилинишича, 22 февраль куни Фарғона вилояти ИИБга келиб тушган мурожаатда Қўқон шаҳрида яшовчи фуқаро Т.М.дан Хўқандий мавзесида яшовчи Барно исмли аёл ўзи билан бирга жинсий алоқа қилган ҳолати туширилган видео тасвирлар борлигини айтиб, пул талаб қилгани келтирилган. Аёл эркакдан ушбу видеоларни ўчириб ташлаш учун 2 минг доллар талаб қилган. Агарда эркак пулларни бермаса, видеотасвирларни тарқатиб, яқинларига кўрсатиш орқали шарманда қилишини айтиб, қўрқитиб келган.
Ҳамкорликда ўтказилган тезкор тадбир давомида Хўқандий мавзесидаги кўп қаватли уйларнинг бири олдида ўзаро келишилгандек Барно исмли аёл ва унинг вояга етмаган жияни Ш.Р.лар биргаликда товламачилик йўли билан фуқаро М.Т.дан 2 минг долларни олган вақтида далилий ашёлар билан қўлга олинган.
Қўқон шаҳар ИИБ ходимлари томонида олиб борилган дастлабки ўрганишлар давомида Барно исмли аёл Қўқон шаҳрида яшовчи 1996 йилда туғилган фуқаро Қ.О. эканлиги маълум бўлган. Ҳозирда ҳолат юзасидан суриштирув ишлари давом этмоқда.
Аввалроқ Самарқандда хорижлик фуқародан шахсий расм ва видеоларини интернетда тарқатмаслик эвазига 20 минг доллар талаб қилган аёл қўлга олингани тўғрисида хабар берилганди.
Изоҳ (0)