Самарқанд вилоятида телефон сотиладиган савдо мажмуасида ўз хотини ва жазманини ишқий муносабатда бўлганликда айблаб, ҳар иккисини пичоқлаб ўлдирган эркакка суд ҳукми ўқилди. Бу ҳақда «Ёшлар» телеканалининг «Янги давр» дастурида маълум қилинди.
Маълум қилинишича, суд иш ҳужжатларини тафтиш қилиб, томонлар ва гувоҳларнинг кўрсатмаларини тинглаган. Музокара вақтида прокурор судланувчига 25 йил озодликдан маҳрум қилиш жазосини беришни сўраган. Жабрланувчилар эса кўпроқ муддат берилишини сўраган.
«Ўша куни мен жаҳл устида ўзимни йўқотиб қўйдим. 43 ёшга кирган бўлсам, ҳеч бундай ҳолга тушмаган эдим. Қаттиқ пушаймонман», — деди судланувчи.
Ҳолат юзасидан суд эркакни Жиноят кодексининг 97-моддаси (қасддан одам ўлдириш) 2-қисми билан 22 йил муддатга озодликдан маҳрум қилди. Жазони умумий тартибдаги колонияда ўташ белгиланди. Шунингдек, жазо муддати 2020 йил 20 ноябрдан бошлаб ўталаётган деб ҳисобланиши таъкидланди.
Эслатиб ўтамиз, 2020 йил 20 ноябрь куни эркак хотини ва жазманининг орқасидан дўконга кириб, у ерда ўзаро жанжаллашган ҳамда қўлидаги пичоқ билан дастлаб бегона эркакнинг бўйин ва танасининг бошқа соҳаларига, сўнгра турмуш ўртоғининг ҳам бўйин ва танасининг бошқа соҳаларига бир неча мартадан пичоқ уриб, уларни қасддан ўлдирган.
Мавзуга доир: Самарқандда аёли ва унинг жазманини ўлдирган эркак воқеа қандай содир бўлганини айтиб берди
Бундан аввал Сурхондарёда поччаси ва икки нафар қариндошига пичоқ урган шахсга жиноят иши қўзғатилгани, Жиззахда маст эркак аёли ва синглисини ҳақорат қилган дўстини таёқ билан уриб, ўлдириб қўйгани ҳамда Қашқадарёда маст ўғил кўчага чиқишига рухсат бермаган отасини пичоқлаб ўлдиргани ҳақида хабар берилганди.
Изоҳ (0)