Бухоро вилоятининг Пешку ва Ғиждувон туманларида иккита шамол электр станциясини қуриш тўғрисидаги инвестиция келишуви Президентнинг 23 февралдаги қарори билан тасдиқланди, деб хабар бермоқда «Gazeta.uz».
Бухоро вилоятида 500-1000 МВт қувватли иккита шамол электр станцияси қурилиши, бунинг учун вилоятнинг Пешку ҳамда Ғиждувон тумани ҳудудлари танлаб олингани ҳақида 2020 йилнинг июлида маълум бўлганди. 2020 йилнинг сентябрида Пешку ва Ғиждувон туманларида шамол электр станцияларининг 10 метеорологик устуни ўрнатилганди.
Мазкур станцияларни қуриш бўйича Энергетика вазирлиги ҳамда инвестор ва лойиҳа компанияси бўлган Саудия Арабистони ACWA Power ўртасида келишув 2021 йилнинг 24 январида имзоланди. Компания томонидан Пешку туманида ACWA Power Dzhankeldy Wind, Ғиждувон туманида эса ACWA Power Bash Wind таъсис этилди.
Ғиждувон туманидаги шамол электр станцияси қуввати 500 МВтни, Пешку туманидаги шамол электр станцияси қуввати эса 300-500 МВтни ташкил этади. Ҳар бир лойиҳани амалга ошириш учун инвестор 650 миллион доллардан маблағ ажратмоқчи.
Ушбу электр станцияларида ишлаб чиқилган электр энергияси «Ўзбекистон миллий электр тармоқлари» АЖ томонидан 25 йил давомида кафолатланган тарзда сотиб олинади.
Аввалроқ Энергетика вазирлиги ACWA Power компаниясини Навоий вилоятида давлат-хусусий шерикчилик асосида қуввати 500 МВт бўлган шамол электр станцияси қурилишига жалб этиш режалаштираётганини маълум қилган эди. Электр станциясини 2022 йилда фойдаланишга топшириш белгиланган.
2021 йилнинг 24 январида ACWA Power компанияси томонидан Сирдарёда табиий газни икки баробар иқтисод қилган ҳолда электр энергияси ишлаб чиқарадиган ИЭС қурилиши бошланди.
Изоҳ (0)