Шавкат Мирзиёев 22 февраль куни «Ўзбекистон Республикасининг Шаҳарсозлик кодексини тасдиқлаш ҳақида»ги қонунни имзолади. Шаҳарсозлик кодексининг янги таҳрири Қонунчилик палатаси томонидан 2020 йил 26 августда қабул қилинган, Сенат томонидан 2021 йил 6 январда тасдиқланган.
Янги кодекс матни ҳозирча эълон қилинмаган. Адлия вазирлиги киритилган асосий янгиликларни санаб ўтди.
Хусусан, кодексга ноёб ва алоҳида муҳим объектлар», «реклама ва ахборот объектлари», «турар жой объектлари», «урбанизация» ва бошқа бир қатор асосий тушунчалар киритилди.
Мазкур кодексда шаҳарсозлик фаолиятининг асосий принциплари аниқ қилиб белгилаб берилди. Шаҳарсозлик фаолияти соҳасидаги жамоатчилик назорати ва унинг шакллари, субъектлари ҳақидаги нормалар мустаҳкамланди. Мазкур соҳадаги қарорларнинг муҳокамасида жамоатчилик назорати иштироки таъминланиши белгиланди.
Кодексга юридик ва жисмоний шахсларга етказилган зарар ўрни қопланишининг асосий йўналишларини белгилаб берадиган ҳамда пудрат учун давлат шартномасини ишлаб чиқиш ва тузиш тартиби, пудрат ишлари қатъий шартнома асосида амалга оширилиши бўйича нормалар киритилди.
Шунингдек, шаҳарсозлик ҳужжатларини экспертизадан ўтказишда экспертларнинг ҳуқуқлари ва жавобгарлиги аниқ кўрсатиб ўтилди.
Эндиликда чет эллик юридик ва жисмоний шахслар ҳам шаҳарсозлик фаолияти субъектлари бўла олади. Ушбу қонун расмий эълон қилинган кундан 3 ой ўтгач кучга киради.
2002 йилдан бери амалда бўлиб келган Шаҳарсозлик кодекси ўз кучини йўқотиб, ўрнига эндиликда ушбу кодекснинг янги таҳрирда ишлаб чиқилган варианти кучга киради.
Изоҳ (0)