Навоийда Зарафшон дарёси бўйидан 2020 йилнинг 15 июлида 45 ёшли эркак жасади топилгани, ҳолат юзасидан жиноят иши қўзғатилиб, вилоят прокуратураси, ички ишлар бошқармаси жиноят қидирув ходимларининг тезкор ҳаракатлари натижасида гумонланувчилар қўлга олингани ҳақида хабар берилган эди. Навоий вилояти суди жамоатчилик ва ОАВ билан алоқалар бўйича бош консултанти Азиза Рўзиеванинг маълум қилишича, қотиллик содир этган шахсларга нисбатан суд ҳукми ўқилди.
Мазкур ҳолат юзасидан олиб борилган терговга қадар текширув ҳаракатлари давомида ушбу номаълум шахснинг мурдаси 1975 йилда туғилган Самарқанд вилояти Пахтачи тумани «Дабусия» маҳалласида яшовчи Т.Й.га тегишли эканлиги аниқланган.
Болалигидан 1-гуруҳ ногирони, ақли заиф, чап қўли ва чап оёғи ёшлигида кўмирдан қолган чўғга йиқилиб тушиб куйган ушбу эркакни одамларнинг кўнглида раҳм-шафқат уйғотишини назарда тутиб, Кармана тумани яшовчи аёл 2 йилдан буён тиланчилик билан мунтазам шуғулланишга мажбур қилиб келган. Тиланчиликдан тушган маблағни ўзи ва қизи учун кунлик кетадиган эҳтиёжларга сарфлаган.
Аёлнинг ўғрилик жинояти учун судланиб, Навоий шаҳар судининг ҳукми билан унга нисбатан тайинланган ахлоқ тузатиш ишлари жазосини ўтаётган 20 ёшли қариндоши (эркак) 2020 йилнинг апрель ойларида унинг уйига яшаш учун кўчиб борган. Йигит Кармана туманида пластик идишларни тўплаб сотиб, топган пулининг бир қисмини янгасига ижара учун бериб, яшаб келган.
Хабарда айтилишича, одатда аҳоли гавжум бозорлар атрофига тиланчилик қилиш учун олиб борилган эркак сўнгги кунларда уйдан тез-тез чиқиб, боши оққан томонга кетадиган, бир оз вақт ўтиб, ўзи яна қайтиб келадиган одат чиқарган. Аёл 26 ёшли қизи ва қариндош йигитга эркакнинг уйдан қочиб кетишининг олдини олиш, унинг тиланчилиги эвазига келаётган даромадни сақлаб қолиш мақсадида уни омборхонага киритиб, устидан қулфлаб қўйишни буюрган.
Шундай қилиб, эркак 2020 йил 12 июндан 12 июлга қадар ҳаво ҳароратининг иссиқлиги, инсон яшаши учун жуда тор, ҳаёти ва соғлиғи учун хавфли бўлган кичик омборхонага устидан қулфлаб ғайриқонуний равишда озодликдан маҳрум қилинган.
2020 йилнинг 12 июль куни соат 22:00 ларда Сардорнинг баланд овозини эшитиб, аёлнинг қизи ва қайнукаси унинг ёнига кирган. Ногиронлиги сабабли бундай шароитда ушлаб турилгани учун қийналган эркак уларни ҳақорат қилган. Бу ҳақоратдан жаҳли чиққан йигит ва қиз тиланчилик қилувчи эркакни оғзини рўмол билан боғлаб, ташқарига олиб чиқиб, оёғини металл занжир билан, қўлларини ип билан боғлаб, ўроқ шаклидаги темир бўлаги билан танасининг орқа ва олд қорин соҳалари, қўл ва оёқларига уриб, унга тан жароҳатлари етказган. Аммо ногирон бўлишига қарамасдан эркак уларга қаршилик кўрсатган.
Шу сабабли қиз ва йигит ўзаро жиноий тил бириктириб, эркакни қасддан ўлдиришни мақсад қилган. Йигит эркакнинг қўлларини маҳкам ушлаб турган, қиз эса оёғи билан унинг бўйин соҳасидан босиб турган. Оқибатда эркак унга етказилган оғир тан жароҳатлари ва юқори нафас йўлларининг беркилиши оқибатида воқеа жойида вафот этган.
Содир этилган қотиллик жиноятининг оқибатидан ва жавобгарликдан қутилиш мақсадида жиноят изларини яшириш учун улар эркакнинг жасадини оқ рангли матодан тикилган қопга солиб, ашёвий далилларни йўқ қилган. Воқеадан хабар топган аёл тезроқ мурдани йўқотишни буюрган ва мурда солинган халта эшак аравага ортилиб, жасад Зарафшон дарёсига ташлаб юборилган.
Жиноят икки кунда фош бўлган. Суд мажлисида судланувчилар қилган жиноятларини тан олган. Йигит 17 йилга, қиз 13 йилга озодликдан маҳрум қилинди. Т.Й.дан тиланчиликда фойдаланган ва уни ғайриқонуний равишда озодликдан маҳрум қилган аёлга эса 5 йилга озодликдан маҳрум қилиш жазоси тайинланди.
Изоҳ (0)