Тошкентда банкоматларга жойлаштириш учун ажратилган 2,3 млрд сўмни ўзлаштирган банк ходимлари ушланди

Тошкентда банкоматларга жойлаштириш учун нақд пулларни талон-торож қилган «Халқ банки» ходими қўлга олинди, дея хабар қилмоқда Бош прокуратура.

Қайд этилишича, Бош прокуратура ҳузуридаги департаментнинг Тошкент шаҳар бошқармаси томонидан «Халқ банки» Чилонзор филиали мурожаатига асосан ўтказилган терговга қадар текширувда филиалнинг хизмат кўрсатиш қурилмалари билан ишлаш бўйича бош мутахассиси Ж.М. ва бошқалар олдиндан тил бириктириб, филиалнинг тумандаги 18 та банкоматларидан 7 ой давомида жами 2,3 миллиард сўм нақд пулни ўзлаштириш йўли билан талон-торож қилганликлари аниқланган.

Мазкур ҳолат юзасидан Ж.М. ва бошқаларга нисбатан Жиноят кодексининг 167-моддаси 3-қисми (жуда кўп миқдорда ўзлаштириш ёки растрата йўли билан талон-торож қилиш) билан жиноят иши қўзғатилиб, тергов ҳаракатлари ўтказилмоқда.

Бундан аввал Ўзбекистонда банкоматлар сони 10 мингтадан ошгани, Ўзбекистондаги банкоматлар ва киоскларнинг деярли 30 фоизи битта банк томонидан ўрнатилгани ҳамда Жиззахда банкоматдаги пулларни ўғирламоқчи бўлган йигит қўлга олингани ҳақида хабар берилганди.