Microsoft президенти Брэд Смитнинг маълум қилишича, компанияда АҚШ федерал ҳукумати муассасаларига ва тижорат компанияларига 2020 йил декабрь ойида уюштирилган йирик киберҳужумда Россия разведкасининг иштироки борлиги тўғрисида далиллар мавжуд. Смит бу ҳақда Сенатнинг Разведка қўмитасидаги йиғилишда айтиб ўтди, деб ёзмоқда «РБК».

Брэд Смит

Фото: Reuters

«Айни пайтда бизда Россия разведкасига ишора қилувчи ишончли далиллар мавжуд, бошқалардан шубҳаланишга олиб келадиган белгилар йўқ», — деди Смит.

Шу билан бир вақтда, киберхавфсизликка ихтисослашган Crowdstrike компанияси раҳбари Жорж Курз унинг компаниясида Москванинг ушбу ҳужумга алоқадорлиги тўғрисида маълумот йўқлигини айтди. FireEye киберхавфсизлик компанияси раҳбари Кэвин Мандиа эса ҳужумда хакерлар қўллаган воситалар Россия фойдаланадиган қурилмаларга ўхшашлигини таъкидлади. «Хакерлик учун ишлатиладиган воситалар Хитой, Шимолий Корея ёки Эрон фойдаланадиган қурилмаларга ўхшамайди», — деди у.

Маълумот учун АҚШ ҳукумати муассасалари ва компанияларга қилинган хакерлик ҳужуми ҳақида 2020 йилнинг декабрида маълум қилинган. Унга кўра, ҳужум ортида Cozy Bear (APT29 сифатида ҳам маълум) гуруҳи турган, уни Россия махсус хизматлари билан боғлашади. The Washington Post ҳамсуҳбатларининг айтишича, хакерлар идора ходимларининг электрон почталарига кирган. Бу 2020 йил баҳорида бўлиб ўтгани тахмин қилинмоқда.

Киберҳужум, шу жумладан, АҚШ ҳукуматига ҳам хизмат кўрсатадиган SolarWinds IT-компанияси янгиланмалари орқали юз берган. SolarWinds унинг 2020 йил мартидан июнигача чиқарилган янгиланмаларидан «миллий давлат» ўз мақсадларида фойдаланган бўлиши мумкинлгини тасдиқлаган.

The New York Times ушбу хакерлик ҳужумини сўнгги беш йилда АҚШ ҳукумати тизимларига қилинган энг йирик ҳужумлардан бири деб атаган.

Россия президентининг матбуот котиби Дмитрий Песковнинг айтишича, Москванинг киберҳужумларга алоқаси йўқ. У аввалроқ Россия президенти Владимир Путин Вашингтонга киберхавфсизлик соҳасида ҳамкорлик қилишни таклиф қилгани, аммо таклиф Америка томонидан жавобсиз қолдирилганини таъкидлаган.

Аввалроқ АҚШ Адлия вазирлиги уч нафар дастурчини (Шимолий Корея фуқаролари) оммавий хакерлик ҳужумини уюштириб, 1,3 миллиард доллар қийматга эга пул ва криптовалюта ўғирлаганликда айблаган эди. Ҳужум банклардан тортиб Голливуд киностудияларини ўз ичига олувчи бир қатор компанияларга уюштирилган.