Қатар футбол бўйича 2022 йилги Жаҳон Чемпионатини ўтказиш ҳуқуқини қўлга киритганидан буён ўтган ўн йил мобайнида мамлакатда Ҳиндистон, Покистон, Непал, Бангладеш ва Шри-Ланкадан келган 6500 дан ортиқ меҳнат муҳожири ҳалок бўлди. Бу ҳақда The Guardian газетаси ушбу мамлакатлар ҳукуматлари тақдим этган маълумотларга таяниб, хабар берди, деб ёзади Meduza.
2011—2020 йиллар давомида Қатарда Ҳиндистон, Бангладеш, Непал ва Шри-Ланкадан чиққан 5927 нафар муҳожир ҳалок бўлган. Бундан ташқари, Покистоннинг Қатардаги элчихонаси маълумотларига кўра, 2010—2020 йилларда мамлакатда 824 нафар покистонлик ишчи ҳалок бўлган.
The Guardian ёзишича, ҳалок бўлган муҳожирларнинг умумий сони бундан ҳам юқори бўлиши мумкин, чунки нашр томонидан йиғилган маълумотлар бошқа мамлакатлар, шу жумладан, Филиппин ва Кениядан келган кўплаб муҳожирлар ҳақидаги ахборотни ҳисобга олмайди. Бундан ташқари, 2020 йил охирида юз берган ўлимлар ҳақидаги маълумотлар ҳам қамраб олинмаган.
Қайд этилган ўлимлар иш фаолияти давомида ёки иш жойида юз берган ўлимлар деб ҳисобланмаса-да, ҳалок бўлган ишчиларнинг кўпчилиги Жаҳон Чемпионатининг инфратузилма лойиҳаларида банд бўлгани эҳтимоли катта, деди Форс кўрфази мамлакатларида меҳнат қилувчилар ҳуқуқларига ихтисослашган FairSquare Projects ҳуқуқни ҳимоя қилиш ташкилоти директори Ник Макгихан. «2011 йилдан буён вафот этган меҳнат муҳожирларининг катта қисми Қатар футбол бўйича Жаҳон Чемпионатини ўтказиш ҳуқуқини қўлга киритгани учунгина ушбу мамлакатга келган», — деди у.
Изоҳ (0)