Андижонда эр аёли ишдан кеч келгани ҳамда уйни тартибга келтирмагани сабабли у билан жанжаллашиб, уни ўлдириб қўйди дея хабар бермоқда ЎзА.
Маълум қилинишича, Андижон шаҳрида Д. исмли аёл ишхонасида ишлар кўпайиб кетгани учун ишдан кеч қайтиб, овқат тайёрлаётган бир пайтда турмуш ўртоғи кўчадан кириб келади. Бу пайтда улар билан бирга яшайдиган хонадон катталари уйда бўлмаган.
Ишдан нега кеч келганлиги, кейин уйнинг саранжом-саришта эмаслиги учун ўртада жанжал бошланади. Эр жаҳл устида аёлини калтаклайди. Аёл ҳушини йўқотиб, шифохонага етиб бормасдан вафот этади.
Суд-тиббий экспертизаси хулосасида марҳумада бош мия ёпиқ жароҳати, тери ости ва тўқималарга қон қуйилишлар, ўткир юрак-қон томир ва нафас етишмовчилиги, шилинма жароҳатлар борлиги қайд этилган.
Жиноят ишлари бўйича Марҳамат туман суди раиси Абдурашид Исоқов раислигида ушбу ҳолат бўйича суд иши кўриб чиқилиб, судланувчи 1994 йилда туғилган Т.С.га нисбатан Жиноят кодексининг тегишли моддалари билан 9 йил муддатга озодликдан маҳрум этиш жазоси тайинланди ва жазони қаттиқ тартибли колонияларда ўташ белгиланди.
Бундан аввал Жиззахда маст эркак аёли ва синглисини ҳақорат қилган дўстини таёқ билан уриб, ўлдириб қўйгани, Бухоролик аёл рашк сабаб эрини пичоқлаб қўйгани ҳамда Қашқадарёда 27 ёшли эркак ухлаб ётган хотинини пичоқлаб ўлдиргани ҳақида хабар берилганди.
