Тошкентда 2021 йилдан чиқиндиларни саралаб йиғиш бошланиши ҳақида хабар берилган эди. Пойтахт ҳокимлиги матбуот хизматининг 22 февраль куни «Махсустранс» ДУКда бўлиб ўтган йиғилиш якунларига кўра маълум қилишича, қаттиқ маиший чиқинди (ҚМЧ)ларни саралаган ҳолда тўплаш тажрибаси Тошкентнинг ҳар бир туманидаги иккита маҳаллада — жами 24 та маҳаллада жорий этилади.
Ушбу маҳаллалар аҳолисига рангли пакетлар берилади. Сариқ пакетлар — қайта ишланадиган чиқиндилар (қоғоз ва пластик), яшил пакетлар органик чиқиндилар (озиқ-овқат қолдиқлари, барглар, ўтлар), кул ранг пакетлар эса қайта ишланмайдиган чиқиндилар (оёқ кийимлари, салфеткалар, памперслар) учун мўлжалланган.
Саралаган ҳолда чиқиндиларни йиғишни рағбатлантириш учун оилаларга ҚМЧни олиб чиқиш учун тўлов тарифи пасайтирилади.
Қайд этилишича, чиқиндиларни олиб кетиш учун ҳафтасига икки маротаба рангли: яшил ва кул ранг-сариқ стикерли машиналар келади (ёзда кўпроқ келади). Ушбу мақсадда «Махсустранс» Осиё тараққиёт банки грант маблағлари ҳисобидан 59 та янги махсус машиналарни харид қилган ва уларга ҳозирги кунда стикерлар ёпиштирилмоқда.
Айни пайтда тажриба учун танланган маҳаллалар аҳолисига чиқиндиларни саралаш зарурияти ҳақидаги ахборотни етказиш тадбирлари кўриб чиқилмоқда. Мактаблар ва маҳалла қўмиталарида мувофиқ мавзудаги маърузалар, қизиқарли дарслар, концертлар ва кичик ҳашарлар ташкил этиш режалаштирилмоқда.
«Тошкентда тўпланадиган чиқиндилар йилдан йилга ошиб бормоқда ва прогнозларга кўра, 15 йилдан кейин унинг ҳажми икки баробар ошади. Ушбу вазиятдаги ягона ечим — чиқиндиларни қайта ишлаш бўлиб, бунинг учун уни саралаш лозим. 2019 йилда Яккасарой туманидаги маҳаллалардан бирида чиқиндиларни саралаб, тўплаш бўйича биринчи лойиҳа амалга оширилди, — деб таъкидлаб ўтган ҳокимлик матбуот хизмати.
Эслатиб ўтамиз, 2020 йилнинг декабрида Президент «Тошкент шаҳрида маиший ва қурилиш чиқиндилари билан боғлиқ ишларни амалга оширишни такомиллаштириш чора-тадбирлари тўғрисида»ги қарорни имзолаганди. Ҳужжатга кўра, биринчи босқичда (2021 йилда) Тошкент шаҳар ҳокимлиги томонидан белгиланадиган маҳалла фуқаролар йиғинлари ҳудудида чиқиндиларни «қайта ишланадиган» ва «қайта ишланмайдиган» тоифаларга ажратган ҳолда йиғиш режалаштирилмоқда.
Иккинчи босқичда (2022 йилда) «Махсустранс» давлат унитар корхонаси томонидан хизмат кўрсатиладиган барча ҳудудлардаги якка тартибдаги турар жой секторида қаттиқ маиший чиқиндиларни «қайта ишланадиган» ва «қайта ишланмайдиган» тоифаларга ажратган ҳолда йиғилади.
Учинчи босқичда (2023 йилдан бошлаб) барча туманларда чиқиндиларни «қайта ишланадиган», «қайта ишланмайдиган», «органик», «хавфли маиший чиқиндилар» ва бошқа тоифаларга ажратган ҳолда йиғиш режалаштирилмоқда.
2019 йилда Тошкент шаҳридаги маиший чиқиндилар ташланадиган Оҳангарон туманидаги полигон 98 фоизга тўлгани маълум қилинганди. Сенатор Баҳодир Тўйчиев Ўзбекистонда 2028 йилгача чиқиндиларни тўплаш ва олиб чиқиб кетиш хизмати барча ҳудудларда 100 фоизга етказиш режалаштирилганини айтганди.
Изоҳ (0)