Ўзбекистон Давлат хавфсизлиги хизмати мамлакат бўйлаб ўтказилган тезкор тадбирлар давомида қатор қонунбузарликларни аниқлади. Бу ҳақда ДХХ матбуот хизмати «Дарё»га хабар қилди.
Хусусан, Тошкент вилоятининг Чиноз тумани ҳокимлигида ишловчи мансабдор шахс балиқчилик хўжалиги ташкил этишни режалаштирган тадбиркорга 1,3 гектар ер майдони ажратилишига ёрдам беришини айтиб, хизмати эвазига 12 800 АҚШ доллари талаб қилади.
ДХХ Тошкент вилояти бошқармаси ходимларининг Иқтисодий жиноятларга қарши курашиш департаментининг ҳудудий бошқармаси билан ҳамкорликда ўтказган тезкор тадбири давомида мазкур шахс дастлабки ҳужжатларни тайёрлаш учун сўралган пулдан 5 минг АҚШ долларини олган вақтида ашёвий далиллар билан ушланди.
Шунингдек, Хоразм вилояти Гурлан туманида истиқомат қилувчи фуқаро укасининг номига аукционда ютиб олинган 5 сотих ерни, шунингдек, унинг ёнида жойлашган туман ҳокимлиги захирасидаги 48 сотих ер майдонини ҳокимликда ишловчи мансабдор танишлари ёрдамида харидор фуқаро номига расмийлаштириб беришни ваъда қилиб, эвазига жами 46 минг АҚШ доллари сўрайди.
Шундан 20 минг АҚШ долларини аванс сифатида олган вақтида ДХХ ва Департамент ходимлари томонидан ушланди.
Шу билан бирга, Сирдарё вилоятида фаолият юритувчи адвокатлик фирмаси адвокати гиёҳванд моддалар савдоси билан боғлиқ жиноят содир этганлиги учун Жиноят кодексининг 273-моддаси (гиёҳвандлик воситалари, уларнинг аналоглари ёки психотроп моддаларни қонунга хилоф равишда тайёрлаш, олиш, сақлаш ва бошқа ҳаракатлар қилиш) билан айбланаётган, Гулистон шаҳрида яшовчи фуқарога нисбатан озодликдан маҳрум этиш билан боғлиқ бўлмаган жазо тайинланишига ёрдам беришини айтиб, 5 минг АҚШ доллари сўрайди.
ДХХ, Бош прокуратура ва Департаментнинг вилоят бошқармалари ходимлари томонидан ўтказилган тезкор тадбирда адвокат сўралган пулни олган вақтида ушланди.
Бундан ташқари, ДХХ Қашқадарё вилояти бошқармаси ва Департаментнинг ҳудудий бошқармаси ҳамкорлигида ўтказилган тезкор тадбирда Касби туманида яшовчи шахс Қарши шаҳрида истиқомат қилувчи фуқарони ўзининг танишлари орқали Миллий гвардия тизимига ишга киритиб қўйиш эвазига ундан 2 минг АҚШ доллари олган вақтида ашёвий далиллар билан ушланди.
Яна бир ҳолатда Қарши туман аҳоли бандлигига кўмаклашиш маркази бош ҳисобчиси «темир дафтар»га киритилган уч нафар фуқарога 6 миллион 690 минг сўмдан, жами 20 миллион 70 минг сўм миқдорида субсидия маблағлари олишларида ёрдам беришини айтиб, эвазига 600 АҚШ доллари олган вақтида ДХХ ва Департамент ходимлари томонидан ушланди.
Ҳозирда мазкур шахсларга нисбатан Жиноят кодексининг тегишли моддалари билан жиноят ишлари қўзғатилган.
Бундан аввал Тошкент вилоятида ҳоким қарорини сохталаштириб, аслида йўқ бўлган уйларни 100 минг долларга сотишга уринган шахслар қўлга олингани, Жиззахда 1 миллион сўм эвазига COVID-19’га чалинганлик ҳақида сохта ташхис қўйиб берган шифокорга жиноят иши қўзғатилгани ҳамда Тошкентда фуқароларни 6500 доллар эвазига вагон кузатувчиси лавозимига ишга киритиб қўймоқчи бўлган «Ўзтемир йўлйўловчи» ходимлари ушлангани ҳақида хабар берилган эди.
Изоҳ (0)