Andijonda er ayoli ishdan kech kelgani hamda uyni tartibga keltirmagani sababli u bilan janjallashib, uni o‘ldirib qo‘ydi deya xabar bermoqda O‘zA.
Ma’lum qilinishicha, Andijon shahrida D. ismli ayol ishxonasida ishlar ko‘payib ketgani uchun ishdan kech qaytib, ovqat tayyorlayotgan bir paytda turmush o‘rtog‘i ko‘chadan kirib keladi. Bu paytda ular bilan birga yashaydigan xonadon kattalari uyda bo‘lmagan.
Ishdan nega kech kelganligi, keyin uyning saranjom-sarishta emasligi uchun o‘rtada janjal boshlanadi. Er jahl ustida ayolini kaltaklaydi. Ayol hushini yo‘qotib, shifoxonaga yetib bormasdan vafot etadi.
Sud-tibbiy ekspertizasi xulosasida marhumada bosh miya yopiq jarohati, teri osti va to‘qimalarga qon quyilishlar, o‘tkir yurak-qon tomir va nafas yetishmovchiligi, shilinma jarohatlar borligi qayd etilgan.
Jinoyat ishlari bo‘yicha Marhamat tuman sudi raisi Abdurashid Isoqov raisligida ushbu holat bo‘yicha sud ishi ko‘rib chiqilib, sudlanuvchi 1994-yilda tug‘ilgan T.S.ga nisbatan Jinoyat kodeksining tegishli moddalari bilan 9 yil muddatga ozodlikdan mahrum etish jazosi tayinlandi va jazoni qattiq tartibli koloniyalarda o‘tash belgilandi.
Bundan avval Jizzaxda mast erkak ayoli va singlisini haqorat qilgan do‘stini tayoq bilan urib, o‘ldirib qo‘ygani, Buxorolik ayol rashk sabab erini pichoqlab qo‘ygani hamda Qashqadaryoda 27 yoshli erkak uxlab yotgan xotinini pichoqlab o‘ldirgani haqida xabar berilgandi.
Izoh (0)