Facebook ижтимоий тармоғи сиёсий реклама тақиқлангани сабабли коронавирусга қарши эмлашнинг афзалликлари тўғрисидаги пуллик постларни блокламоқда, дея хабар берди Politico.
Хабарга кўра, ижтимоий тармоқ алгоритмлари эмлаш марказлари, шунингдек, вакцинанинг таъсир механизмлари тўғрисидаги пуллик постларни тармоқдан олиб ташлайди. Бундай постлар камида 110 та гуруҳда блокланган — мазкур ҳолат алгоритмларнинг бу каби рекламаларни сиёсий деб ҳисоблаши билан боғлиқ.
Таъкидланишича, блокланган хабарлар юзасидан даъво очилиши мумкин, аммо бу жараён жуда машаққатли ва кўп вақт талаб этади, шунингдек, коронавирус ҳақидаги маълумотлар жуда тез ўзгариши туфайли бундан наф бўлмайди.
Facebook вакиллари муаммони тан олди ва иккита гуруҳда рекламалар тикланганини маълум қилди. Келажакда ижтимоий тармоқ маъмурияти бундай хабарлар блокланишини тўхтатишга ваъда берди.
Аввалроқ Facebook ижтимоий тармоғи австралиялик фойдаланувчилар ва оммавий ахборот воситаларини тармоқда маҳаллий ва халқаро янгиликларни улашиш имкониятидан маҳрум қилган эди. Бунга қабул қилиниши кутилаётган қонун сабабчи бўлган, унга кўра янгиликлар улашилган тақдирда, Facebook, Google ва бошқа платформалар ўз контентлари учун ОАВга пул тўлаши керак.
Шунингдек, Telegram асосчиси Павел Дуров мессенжерда ҳуқуқ-тартибот идоралари ходимлари ҳақида маълумот берувчи каналлар блокланганини маълум қилганди. Бунга сабаблардан бири сифатида ушбу каналларда зўравонликка чақириқлар борлигини кўрсатган.
Эслатиб ўтамиз, 16 февраль куни Parler ижтимоий тармоғи фаолиятини қайта тиклади. Тармоқ Трамп тарафдорлари орасида оммалашгани ҳамда 6 январь кунги Вашингтондаги тартибсизликлар туфайли Apple, Google ва Amazon компаниялари томонидан блокланганди. Parler’нинг ижрочи директори Жон Матце 29 январь куни компаниядан ҳайдалган.
Изоҳ (0)