Польша ҳукумати келаси ҳафтадан мамлакатга олиб кирувчи барча чегараларда коронавирус учун топширилган тестнинг салбий натижасини талаб қилувчи қонун жорий этишни режалаштирмоқда. Бу ҳақда республика соғлиқни сақлаш вазири Адам Недзельскийга таяниб «Korrespondent.net» хабар берди.
«Мазкур қонунни шу ҳафта амалга киритиш ҳақида ўйлаяпмиз. Биз қоидаларни тўлиқ ишлаб чиқиш, тафсилот ва хизматларни тайёрлаб қўйишни истаймиз, чунки бу чегара қўриқчиларининг фаолияти қайта тикланишини билдиради. Чегарачиларнинг таъкидлашича, танланган чегара пунктларида тезкор тайёргарликка эришиш учун камида 48 соат вақт керак. Шунинг учун ўзгартиришлар ҳафта охирига қадар амалга ошади, деб ўйлайман», — деди вазир ҳамда республиканинг ғарбий ва жанубий чегараларида ҳам тест ўтказилишини таъкидлади.
Унга кўра, тест ўтказилмаган тақдирда республикага кириб келаётган фуқаро 10 кун давомида изоляцияда бўлади.
Шу билан бирга, аввал коронавирусга қарши эмланганлар ва бир қатор касб эгалари: дипломатлар, балиқчилар, денгизчилар, юк машинаси ҳайдовчилари, шифокорлар, шунингдек, талабалар ва спорт тадбирлари иштирокчилари карантиндан озод қилинади.
Аввалроқ Италияда коронавируснинг янги штамми туфайли чекловлар кучайтирилгани ҳақида хабар берилганди. Мамлакат бош вазири Жузеппе Конте Италия ичида ҳудудлараро ҳаракатланиш учун қўйилган тақиқ 25 февралга қадар узайтирилганини эълон қилган.
Шунингдек, Латвия пандемия туфайли икки ҳафтага чегараларини ёпгани ҳақида хабар берилганди. Мамлакатга кириш учун тақиқ 11 февралдан 25 февралгача амал қилади.
Буюк Британияда эса 15 февралдан бошлаб COVID-19 хавфи юқори бўлган давлатлардан ташриф буюрувчилар учун икки ҳафталик мажбурий карантин жорий этилди. «Қора рўйхат»даги мамлакатлардан қайтган фуқаролар ўн кунни «COVID-меҳмонхоналар»да ўтказиши керак.
Изоҳ (0)