Hukumat to‘ntarilishi paytida harbiylar tomonidan hibsga olingan Myanma prezidenti U Vin Mint prezident saroyidan boshqa binoga ko‘chirildi, uning qayerdaligi noma’lum deya xabar bermoqda “RIA Novosti” “Demokratiya uchun milliy liga” partiyasi rahbarining matbuot kotibi U Chji Toga asoslanib.

Foto: SOPA

“Prezident va uning oilasi prezident qarorgohidan boshqa uyga ko‘chirildi”, – deb yozdi Chji To Facebook’dagi sahifasida.

Boshqa bir postida u davlat maslahatchisi (Myanma bosh vaziri), Nobel mukofoti sovrindori Aun San Su Chjining sog‘lom va hanuzgacha poytaxt Neypidodagi qarorgohida uy qamog‘ida ekanligini e’lon qildi.

“Aun San Su Chji xonim sog‘lom, u davlat maslahatchisi qarorgohida”, – deb yozgan u.

U Chji To 3-fevral kuni Myanma prezidenti va davlat maslahatchisi Aun San Su Chji ikki band bo‘yicha ayblanayotganini aytdi.

Myanma siyosiy mahbuslarga yordam uyushmasining xabar berishicha, hokimiyat armiyaga o‘tkazilgandan so‘ng Neypidoda 133 partiya a’zosi, shu jumladan, parlamentning katta guruhi hibsga olingan. Yana 14 kishi Yangon va mamlakatning boshqa shaharlarida qamoqqa olingan. Myanma OAV 1- va 2-fevral kunlari mamlakat bo‘ylab jami 400 dan ortiq odam qo‘lga olinganligini xabar qildi.

Eslatib o‘tamiz, 1-fevral kuni Myanma harbiylari mamlakatda hokimiyatni qo‘lga kiritganini e’lon qildi, hukmron partiya rahbarlari va mamlakat prezidenti hibsga olindi. Qurolli kuchlar bosh qo‘mondoni Min Aung Xlayn mamlakatning muvaqqat prezidenti etib tayinlandi va mamlakatda bir yil muddatga favqulodda holat joriy etildi.

Davlat to‘ntarishiga sabab qilib o‘tgan yilgi saylovlardagi soxtaliklar va saylov komissiyasining harakatsizligi ko‘rsatildi. 2020-yil noyabrda bo‘lib o‘tgan saylovlarda “Demokratiya uchun milliy liga” partiyasi hukumat tuzish uchun yetarlicha ovoz to‘plagan, harbiylar tomonidan qo‘llab-quvvatlangan partiya esa mag‘lub bo‘lgan.

BMT bosh kotibi Antoniu Guterrish qurolli kuchlarning harakatlarini “Myanmada amalga oshirilgan demokratik islohotlarga jiddiy zarar yetkazish” deya qoraladi. Shuningdek, AQSh davlat kotibi Entoni Blinken Myanma davlat rahbarlarining hibsga olinishidan xavotir bildirdi va harbiylarni hibsga olingan siyosatchilarni ozod qilishga chaqirdi.

Harbiylar, shuningdek, o‘tgan yilgi saylov natijalarini qayta tekshirish uchun saylov komissiyasini isloh qilishga va yangi saylovlardan so‘ng hokimiyatni saylangan partiyaga topshirishga va’da berdi.