Президент Шавкат Мирзиёев Наманган вилоятидаги ташрифи давомида қишлоқ хўжалиги соҳасини ривожлантиришга оид бир қанча лойиҳалар билан танишаркан, Ўзбекистонда картошкачилик йўналишига катта аҳамият қаратиш зарурлигини қайд этди, дея хабар бермоқда «Дарё» мухбири.
«Ўзбекистон шароитида ердан самарали фойдаланишимиз керак. Қайси ҳудудга қандай навдаги картошка экиш бўйича тажрибамиз етарли эмас. Илмий ёндашув йўқлиги боис картошкани ҳам кўнгилдагидек етиштира олмаяпмиз. Ҳосилдорлик бўйича аниқ бир мақсадга эришишимиз учун бу соҳадаги илмий салоҳиятимизни юксалтиришимиз зарурлигини ҳаёт ва замоннинг ўзи тақозо қиляпти.
Картошкани ҳозиргача жуда катта ҳажмда импорт қиляпмиз. 1,8 миллион тоннага эҳтиёжимиз бор, шунга яраша ер ҳам ажратилган, аммо ҳосилдорлик паст», – деди Президент.
Давлат раҳбари бу борада Венгрия давлати билан ҳамкорликни йўлга қўйиш кераклигини таъкидлади.
«Венгрия мамлакати билан ҳамкорликни янада кучайтиришимиз лозим. Уларнинг картошкачилик йўналишида ҳам илми жуда кучли, тажрибаси катта. Венгрия халқи ерга меҳр қўйган ва меҳнаткаш. Бу мамлакат бизга интеллектини бермоқчи. Шу боис Венгрия давлати билан бу борадаги ҳамкорликни кенгайтириш, алоҳида илмий-тадқиқот марказини ташкил этишимиз зарур», – деди Шавкат Мирзиёев.
Президент қишлоқ хўжалиги вазири Жамшид Хўжаевга картошкачилик бўйича жиддий шуғулланиш, ҳосилдорликни кўтариш бўйича топшириқ берди.
Бундан аввал Шавкат Мирзиёев Наманган вилоятига ташрифини Янгиқўрғон туманидан бошлагани ҳамда Chust textile хусусий тўқимачилик корхонасини бориб кўргани ҳақида хабар берилганди.
Изоҳ (0)