Венгриянинг Будапешт шаҳрида 17 февраль куни Венгрия ва Ўзбекистон ишбилармон доираларининг бир қатор вакилларини жамлаган бизнес-форум бўлиб ўтди, деб хабар бермоқда Инвестициялар ва ташқи савдо вазирлиги матбуот хизмати.
Хабарга кўра, форумнинг очилиш маросимида Ўзбекистон бош вазирининг ўринбосари — инвестициялар ва ташқи савдо вазири Сардор Умурзоқов ва Венгрия ташқи ишлар ва ташқи иқтисодий алоқалар вазири Петер Сийярто иштирок этди.
Бизнес-форум давомида, шунингдек, вазирликлар, идоралар, тармоқ бирлашмалари ҳамда Ўзбекистон ва Венгриянинг етакчи компаниялари раҳбарлари ўртасида «G2B» ва «V2V» учрашувлари ўтказилди. Унда иштирокчилар қўшма корхоналар ташкил этиш ва ўзаро манфаатли савдо битимларини тузиш масалаларини атрофлича муҳокама қилиш имкониятига эга бўлди.
Тадбир якунида Ўзбекистоннинг турли ҳудудларида паррандачилик, балиқчилик, чорвачилик ва озиқ-овқат саноати соҳаларида 12 та инвестиция лойиҳаларини амалга ошириш бўйича қатор икки томонлама битимлар имзоланган. Бундан ташқари, 76 та янги истиқболли инвестиция лойиҳаси устида биргаликда ишлашни давом эттиришга келишиб олинган бўлиб, улардан 26 таси бўйича Ўзбекистон ва Венгрия тарафлардан ҳамкорлар аниқланган ва тегишли музокаралар олиб борилмоқда.
Шунингдек, Инвестициялар ва ташқи савдо вазирлиги ҳузуридаги Экспортни рағбатлантириш агентлиги ва Савдони ривожлантириш бўйича Венгрия агентлиги ўртасида ҳамкорлик тўғрисида битим, ўзаро сайёҳлик оқимлари ҳажмини кўпайтириш бўйича Ўзбекистон Хусусий туризм ташкилотлари Ассоциацияси ҳамда Венгрия Сайёҳлик агентликлари ва туроператорлари Ассоциацияси ўртасида ҳамкорлик тўғрисида битим, шунингдек, Ўзбекистонда фармацевтика соҳасида таълим тизимини такомиллаштириш бўйича Ўзбекистон фармацевтика саноатини ривожлантириш агентлиги ҳамда Венгрия фармакологик кластери ўртасида ҳамкорлик тўғрисида битим имзоланган.
Изоҳ (0)