Қуёшли мамлакат — Японияда йилнинг қайси фасли бўлишидан қатъи назар, маданий ҳордиқ чиқариш мумкин бўлган жойлар кўп. Яёи Кусама инсталляциялари тўплами, дунёдаги энг баланд музей, ҳайкалтарошлик боғлари ҳамда санъат ороллари сизни мафтун қилиши, шубҳасиз.
Яёи Кусама музейи, Токио
Мамлакатда замонавий рассомчиликнинг таниқли вакили Яёи Кусаманинг 2017 йилда ўзининг фаол иштироки билан ташкил этилган шахсий музейи бор. Мазкур музей икки йиллик танаффусдан сўнг, 2020 йилда қайта очилди: чипталарни интернет орқали олдиндан буюртма қилиш лозим. Музейда рассомнинг Япония ва чет элларда намойиш этилмаган сўнгги асарлари ўрин олган. Март ойининг охиригача музейда Кусаманинг сўнгги ўн йил ичидаги энг катта хитларидан бири — «Кўзгули хонанинг чексизлиги» номли психологик асаридан баҳраманд бўлиш мумкин. Шунингдек, музей менюсида рассомнинг янги «Гуллар шайдоси» асари ҳам ўрин олган.
Наосима арт-ороли, Тесима ва Инужима
Сето ички денгизидаги кичик оролларни арт-архипелагга айлантириш ғояси тадбиркор ва миллиардер Соичиро Фукутаке хаёлига Япония иқтисодиёти энг юқори чўққисига чиққан 80 йилларнинг ўрталарида келган. Икки корпорация — Benesse Holdings, Inc вa Fukutake Foundation замонавий рассомлар, таниқли меъморлар ва ҳайкалтарошлар билан ҳамкорликда иш бошлади. Уларнинг саъй-ҳаракатлари натижасида ороллар табиати арт-сюрреализм кўринишига эга бўлди.
Очиқ осмон остидаги Ҳаконе музейи
Одатда, сайёҳлар Ҳаконега табиатдан завқ олиш учун боради: мох билан қопланган ўрмон, сокин кўл, осойишта қарағайзорнинг тоза ҳавоси. Энди бу гўзалликларга юзта очиқ турдаги арт-иншоотларни қўшинг: Родин, Миро ва Генри Мур ҳайкалларидан тортиб замонавий рассомларнинг мураккаб асарларигача. Очиқ осмон остидаги Ҳаконе музейи 70 минг квадрат метр майдонда ташкил этилган бўлиб, санъатнинг мукаммал уйғунлигини шу ердан топасиз.
Саппоро арт-парки, Саппоро
Яна бир ажойиб очиқ осмон остидаги музей шимолий орол — Хоккайдода жойлашган. Одамлар бу ерга илиқ мавсумда келишади (музей апрелдан ноябргача ишлайди): санъат асарлари билан тўла ўрмон бўйлаб сайр қилиш учун бу ерда 74 та санъат асари мавжуд. Баъзи инсталляциялар ретрофутуристик услубда бўлиб, тушуниш қийин. Баъзилари эса япон менталитетини мукаммал акс эттиради.
Моri
Моri арт-музейи Токионинг Роппонги туманидаги 54 қаватли бинода жойлашгани учун энг юқорида жойлашган бадиий коллекция ҳисобланади. Музейда доимий коллекция йўқ, аксинча экспозициялар доимий равишда ўзгариб туради, сайт янги лойиҳалар ва кўргазмаларни қабул қилади. Музей таъмирлаш ишлари сабабли бутун қиш бўйи ёпиқ эди, аммо шу йилнинг 22 апрелидан қайта очилиши режалаштирилган.
Фукусима шаҳар-музейи
Фукусима 2011 йилги даҳшатли офатдан тўлиқ қутулиб, шаҳар очилишини фахр билан эълон қилган шаҳар-музейдир. Марказий кўчалардаги графиттилар шаҳарни очиқ осмон остидаги замонавий санъат музейига айлантирган. Агар сизни кўча санъати қизиқтирса, бу шаҳар айнан сизбоп эканлиги аниқ.
Мавзуга доир:
Изоҳ (0)