Қишда Дубайга бориш учун 4 сабаб

Қишнинг совуқ ва рангсиз кунларида саёҳат қилишни истайдиган, аммо карантин сабаб қаерга боришни ва қанчалик хавфсиз эканлигини билмаётганлар учун Дубайдан яхшиси йўқ. Аксари кишилар қишки таътилни ўтказиш учун мақбул деб билган ва дам олиш учун жўнаб кетган ушбу шаҳарнинг сайёҳлар учун афзалликлари ҳақида маълумот бериб ўтамиз.

Халқаро туризм учун очиқ

Пандемия сабаб таътил ўтказса бўладиган курорт шаҳарларнинг ҳаммаси ҳам очиқ эмас. Қишин-ёзин қуёш нуридан баҳра олиш мумкин бўлган Дубай эса бундан мустасно. Дубайда оилавий, дўстлар билан ёки ёлғиз дам олишингиз, қумли соҳилда қуёшда тобланиш, гастрономик туризмдан баҳра олиш, бинолар ва қадамжоларни кезиб кўз қувнаши ҳамда хоҳишга қараб турли даражадаги меҳмонхоналарда дам олиш мумкин.

Хавфсизлик

Амирлик томонидан ташриф буюрганларнинг хавфсизлиги ва саломатлиги ҳақида қайғуриб амалга оширилган чора тадбирлар сабаб Дубай биринчилардан бўлиб World Travel & Tourism Council ташкилотининг хавфсизлик бўйича Safe Travels Stamp сертификатини қўлга киритган. Дубай халқаро аэропортидаги турли ҳудудларга жойлаштирилган сканерлар орқали аэропорт биносига кириб келаётган сайёҳ ва меҳмонлар, шунингдек, ходимларнинг тана ҳарорати ўлчаб турилади. Қўшимча ҳимоя учун рўйхатга олинадиган ва паспорт назорат қилинадиган жойларда махсус тўсиқлар ўрнатилган. Келган туристларнинг барчаси ўзи билан бирга 96 соатдан ошмаган вақт ичида топширилган манфий ПЗР-тест натижасини олиб келишлари лозим.

Бу ҳали ҳаммаси эмас, эҳтиёт чораларини янада кучайтириш учун аэропортнинг ўзида қўшимча бепул ПЗР-тест топшириш ташкил қилинган. Натижани сутка давомида махсус дастур орқали билиш мумкин бўлади. Қолаверса, Амирликка учаётганлар учун туристик суғуртага ҳожат йўқ. Чунки авиакомпаниянинг ўзи йўловчиларни коронавирус билан боғлиқ тиббий ва карантин харажатларини бепул қоплайди.

Об-ҳаво

Қишки совуқдан чарчаб иссиқ об-ҳавони соғинганлар учун Дубай яхши вариант. Ҳаво ҳароратининг қулайлиги сабаб дам олувчилар пляжда ҳордиқ чиқариши мумкин. Кеч бўлиши билан ҳароратнинг ёқимли салқин экани эса очиқ ҳавода атрофдаги манзарани кузатиб, кечки овқат қилиш имконини беради.

Диққатга сазовор жойлар

Дубайда диққатга сазовор жойлар кўп эканига қарамай, биринчи бўлиб баландлиги 828 метрни ташкил қиладиган дунёга машҳур Бурж Халифа’га бориш тавсия қилинади. Харид қилишни истайдиган бўлсангиз, Dubai Маll’га боришингиз мумкин. Умумий майдони 200 футбол майдонига тенг бўлган, 1 миллион квадрат метрни ташкил қиладиган мазкур савдо марказида вақт қандай ўтиб кетганини билмай қолишингиз аниқ.

Кечки вақтни эса Downtown кварталида жойлашган, дунёдаги энг баланд «куйловчи» фаввора Dubai Fountain’ни томоша қилиш билан ўтказишингиз мумкин. Ҳар куни соат кечки 6 да бошланиб ярим соат давом этадиган шоуни томоша қилиб дилингиз яйрайди.

Шарқнинг ўзига хослигига гувоҳ бўлиш учун эса Ал Фаҳиди кварталига боринг. Шунингдек, йўл-йўлакай Grand Souk Deira шарқ бозори ва қўшни зираворлар бозори Spice Souk’ни айланишни ҳам унутманг.

Қолаверса, кўплаб сайёҳлар қизиқиш билдираётган La Меr пляж комплексига ҳам ташриф буюришингиз мумкин. Дубайда дунёга машҳур кўнгилочар боғларида вақтингизни чоғ ўтказишингиз, диққатга сазовор жойларда маданий ҳордиқ чиқаришингиз, юқори технологиялар асосида ташкил қилинган кўргазмаларда иштирок этишингиз ва саҳро-экскурсиясида қатнашиб, бир олам эмоция ва ёқимли хотираларни ўзида мужассам этадиган фотолар билан уйга қайтишингиз мумкин.