SpaceX космик компанияси асосчиси ва Tesla бош директори Илон Маск дунёдаги энг бой одам мақомидан ажралди, деб ёзади Bloomberg Billionaires Index рейтингига таяниб, «РБК». Amazon асосчиси Жефф Безос ундан ўзиб кетди.
Америка биржаларида савдолар якунлангач, Маскнинг бойлиги 190 миллиард долларга баҳоланди. Бир кун ичида у 4,58 миллиард долларга камайди. Безоснинг бойлиги эса 191 миллиард доллар деб баҳоланмоқда, бизнесмен бир кунда 372 миллион доллар йўқотган.
Ушбу рейтингнинг учинчи поғонасида эса Microsoft корпорацияси асосчиси Билл Гейтс жойлашган, унинг активлари 137 миллиард долларга баҳоланмоқда.
Маск 7 январь куни Безосни ортда қолдириб, дунёдаги энг бой бизнесменига айланганди. Ўша куни унинг бойлиги 9 миллиард долларга ўсиб, 186,5 миллиард долларни ташкил этди.
Маск дунёдаги энг бой одамлар рўйхатида Безосни ортда қолдиргандан сўнг, у ўзининг Twitter’даги саҳифасида маҳкамланган постни ўзгартириб, 2018 йилда ўз бойлигининг ярмини Марсда шаҳар қуришга йўналтиришга ваъда берган постини қайта жойлаган. Маскнинг ўзи Марсни мустамлака қилиш учун барча мол-мулкини сотишга қарор қилганини айтган. «Аслида, менда компаниянинг акцияларидан ташқари пул қийматидаги мулким деярли қолмайди», — деган у. Аввалроқ Маск 2050 йилга қадар Марсда 1 миллион аҳолиси бўлган шаҳар қуришни режалаштирганини айтганди.
2020 йил бошларида Маскнинг бойлиги тахминан 27 миллиард долларга баҳоланганди. Сўнгги бир йил ичида бизнесменнинг бойлиги кескин ўсди. Ўсишнинг асосий қисми, 700 фоиздан кўпроғини Tesla акциялари ҳисобига бўлган. 21 декабрь куни у S&P 500 индексига киритилди.
Безос 2017 йилдан бери сайёрадаги энг бой одам мақомини сақлаб турди. Forbes ҳисоб-китобига кўра, 2020 йилда у ўз капиталини 67,5 миллиард долларга кўпайтириб,182 миллиард долларга етказди.
Эслатиб ўтамиз, Amazon асосчиси Жефф Безос 2021 йилнинг учинчи чорагида компания бош директорлиги лавозимидан кетиши ва директорлар кенгашининг ижрочи раиси бўлиши ҳақида хабар берилган эди. Унинг ўрнини 1997 йилдан бери Amazon’да ишлаб келаётган ва Amazon Web Services’ни бошқарадиган Энди Жесси эгаллайди.
Мавзуга доир:
- Владимир Потанин 30 млрд доллар бойликка эга бўлган тарихдаги биринчи россияликка айланди
- Bumble танишув хизмати асосчиси муваффақиятга ўз кучи билан эришган энг ёш миллиардер аёлга айланди
- Tesla акциялари қимматлашуви фонида Илон Маск бир ҳафтада 11,5 млрд долларга бойиди
- Жефф Безос 2021 йилнинг учинчи чорагида Amazon бош директори лавозимини тарк этади
- Илон Маск дунёдаги энг бой одамга айланди
Изоҳ (0)