Tesla ва SpaceX раҳбари Илон Маскнинг Россия президентига аталган, Clubhouse овозли ижтимоий тармоғи орқали мулоқот қилиш ҳақидаги, таклифини Кремлдагилар қизиқарли деб атади. Бу ҳақда Владимир Путиннинг матбуот котиби Дмитрий Песков журналистлар билан суҳбатда айтиб ўтди, деб ёзади Meduza.
Шу билан бирга, у Кремль айнан нима таклиф қилинаётганини тушунишни исташини айтди.
«Биласизми, биз олдин тушуниб олишни хоҳлаймиз. Биласизки, президент Путиннинг ўзи бевосита ижтимоий тармоқлардан фойдаланмайди. Уларни шахсан ўзи юритмайди. Умуман олганда, бу, албатта, жуда қизиқ таклиф. Аммо биз нима назарда тутилганини, нима таклиф этилаётганини тушуниб олишимиз керак. Шунинг учун биринчи буларнинг ҳаммасини текшириб кўрамиз ва кейин жавоб қайтарамиз», — деди Песков.
Эслатиб ўтамиз, 14 февраль куни Илон Маск Россия президенти Владимир Путинни Clubhouse ижтимоий тармоғи орқали мулоқот қилишга чақирган эди. «Сиз билан суҳбатлашиш катта шараф бўлган бўларди», — деб ёзди Маск рус тилида Россия президенти расмий саҳифасини «тег» қилиб.
Clubhouse — 2020 йил апрелида ишга туширилган ёпиқ ижтимоий тармоқ. Унга уланиш учун бошқа иштирокчилардан таклиф олиш керак. Мулоқот виртуал хоналарда овоз ёрдамида амалга оширилади. Илон Маск, Марк Цукерберг каби таниқли шахслар аъзо бўлганидан кейин, 2021 йил бошида ижтимоий тармоқ янада оммалашиб кетди.
Шу жумладан, Clubhouse мобил дастури Ўзбекистонда ҳам оммалашди: у iOS қурилмалари учун юклаб олинган дастурлар қаторида биринчи ўринга чиқиб олди.
Мавзуга доир:
- Clubhouse мобил дастури App Store Uzbekistan рейтингида биринчи ўринга чиқиб олди
- Илон Маск Россия президентини Clubhouse ижтимоий тармоғи орқали мулоқот қилишга таклиф этди
- Илон Маск ва Граймс Х Æ А-12 исмли ўғли билан тушган суратларини илк бор намойиш этди
- Tesla акциялари қимматлашуви фонида Илон Маск бир ҳафтада 11,5 млрд долларга бойиди
- Эрдўғон Илон Маск билан телефон орқали космик технологиялар соҳасида ҳамкорлик қилишни муҳокама қилди
Изоҳ (0)