Буюк Британияда коронавируснинг янги штамми пайдо бўлди ва яна ўнта мамлакатда тарқалишга улгурди, унга B.1.525 деб ном берилди. Бу ҳақда Эдинбург университети олимлари хабар берди, деб ёзади «РБК».
Ушбу мутация билан касалланганлар, мутахассислар тақдим этган ҳисоботга кўра, қуйидаги мамлакатларда аниқланган: Дания (35 та ҳолат), Буюк Британия (33), Нигерия (12), АҚШ (10), Франция (5), Гана (4), Канада (3), Австралия (2), Иордания (2), Бельгия (1), Испания (1). Илк ҳолатлар 2020 йил декабрида қайд этилган.
The Guardian ёзишича, олимлар фикрига қараганда, ушбу вариант вируснинг ҳужайраларга киришига ёрдам берувчи тикансимон оқсилдаги мутация билан фарқланади. Вирусдаги бундай ўзгариш организм томонидан ишлаб чиқариладиган нейтраллаштирувчи антитанадан яхшироқ қочиш имконини беради. Худди шу мутация аввалроқ Жанубий Африка ва Бразилияда ҳам аниқланган эди.
2020 йил декабрида Буюк Британия коронавируснинг янги, «одатий» SARS-CoV-2’дан кўра юқумлироқ тури пайдо бўлгани ҳақида хабар берган эди. Жаҳон соғлиқни сақлаш ташкилоти (ЖССТ) маълумотларига кўра, янги штамм оддийсидан тезроқ тарқалмоқда, аммо тарқалиш усули худди шундай. Февралда британиялик экспертлар ундан ўлим даражаси юқорироқ эканини аниқлади. Ўртача олганда, дастлабки маълумотларга кўра, «британча» штамм билан касалланиш ҳолатида ўлим хавфи 1,53 мартага кўпроқ.
Аввалроқ россиялик олимлар коронавируснинг «британча» штаммини аниқлайдиган дунёдаги биринчи тест тизимини ишлаб чиқиб, уни рўйхатдан ўтказгани ҳақида хабар берилганди.
Эслатиб ўтамиз, 2021 йил 30 январь куни коронавируснинг «британча» штамми Ўзбекистонга кириб келгани маълум бўлган. У 23 январь куни Дубайдан қайтиб келган 10 ёшли қизчада аниқланган. ЎзССВ коронавируснинг янги штамми аниқланган қизча ҳақида 1 ҳафтадан кейин маълум қилинганига изоҳ берган.
Коронавирусга қарши кураш штаби аъзоси Нурмат Отабеков мазкур штамм аниқланган бемор аэропортнинг ўзида алоҳидалангани ва вирус одамлар орасига киришига йўл қўйилмагани ҳақида маълум қилган.
Изоҳ (0)