Clubhouse mobil dasturi App Store Uzbekistan reytingida birinchi o‘ringa chiqib oldi

Clubhouse mobil dasturi O‘zbekistonda iOS qurilmalari uchun yuklab olingan dasturlar qatorida birinchi o‘ringa chiqib oldi. Bu haqda App Annie mobil tahlil servisi ma’lumotlariga tayanib, Spot xabar berdi.

Clubhouse — 2021-yildagi eng tez ommalashayotgan ijtimoiy tarmoqlardan biri: ikki haftadan kamroq vaqt ichida undan 2 millionga yaqin foydalanuvchi ro‘yxatdan o‘tgan bo‘lib, u Ilon Mask kabi mashhurlar va yuzlab million dollarli investitsiyaga ega Andreessen Horowitz kabilarni o‘ziga jalb etmoqda.

Hozircha servisdan faqatgina taklif orqali foydalanish mumkin. iOS operatsion tizimida ishlaydigan servisda eshitish va gapirish mumkin, xolos.

Muloqot istalgan foydalanuvchi yaratishi mumkin bo‘lgan “xonalar”da va bitta mavzu atrofida birlashgan odamlardan iborat “klublar”da bo‘lib o‘tadi. “Xonalar” ochiq, faqat foydalanuvchilar uchun, maxfiy yoki faqat “klub” a’zolari uchun ko‘rinishida bo‘ladi.

“Xona”ni istalgan vaqtda leave quietly tugmasi yordamida (“sekin ketish”) tark etish mumkin — mazkur holatda ishtirokchi shunchaki suhbatdan uziladi.

“Jonli” muloqot — servisning boshqa ijtimoiy tarmoqlar va zamonaviy mediadan asosiy farqi hisoblanadi. Clubhouse’da barcha real vaqtda gapiradi va har bir suhbat o‘ziga xos — oldindan yozib olingan qaydlar mavjud emas.

O‘zbekistonda bu kabi “xonalar”da Zafar Hoshimov, Sarvar Ro‘zmetov, Akmal Payziyev, Kiril Altman va boshqa qator tadbirkorlarni uchratish mumkin.

Eslatib o‘tamiz, 2021-yilning yanvar oyida Telegram dunyoda eng ko‘p yuklab olingan dasturga aylangan edi.