Конгода Эбола касаллигига қарши эмлаш кампанияси расман бошланди, деб хабар берди Жаҳон соғлиқни сақлаш ташкилоти (ЖССТ)нинг Африка минтақавий бюроси расмий Twitter саҳифасида.
«Эболага қарши эмлаш кампанияси Конго Демократик Республикасининг Бутембо шаҳрида, вирус қайта пайдо бўлганидан бир ҳафта ўтгач, расман бошланди. Вакцинани Эбола касаллигидан илк бемор даволаниб чиққан Матанда шифохонасининг тиббиёт ходимлари қабул қилди», — дейилади хабарда.
🇨🇩:#Ebola vaccination campaign officially launched in #Butembo #DRC — just one week after the resurgence of the virus. Health workers at Matanda health centre, where the first Ebola patient was treated, were the first to be vaccinated. pic.twitter.com/tNucuLpkrC
— WHO African Region (@WHOAFRO) February 15, 2021
Бундан аввал ЖССТ Гвинеяда Эбола безгаги эпидемияси бошланганини эълон қилганди. ЖССТ мутахассислари аллақачон Гвинея билан чегарадош мамлакатлар ҳукуматлари билан биргаликда касаллик тарқалишининг олдини олиш учун тайёргарлик кўрмоқда. Маълум қилинишича, Гвинеяда 2016 йилдан бери илк марта Эбола вирусидан тўртта ўлим ҳолати қайд этилган.
Маълумот учун, Эбола вируси одам ва ҳайвонларга таъсир қилувчи ўткир инфекцияни келтириб чиқаради. Касаллик биринчи марта 1976 йилда аниқланган. Ушбу вирусли касаллик 2013—2016 йилларда Ғарбий Африкада жуда кенг тарқалиб кетди. Гвинеяда бошланган касаллик Либерия ва Сьерра-Леонега ҳам ўтиб кетди. Касалликнинг ўзига хос хавфли жиҳати унда касалланганлар орасида ўлим ҳолатининг юқорилигидадир. Ўша пайтда 11 315 киши ёки касалларнинг 50 фоизи вафот этган. 2019 йилнинг июль ойида Конгода қайд этилганидан кейин ЖССТ халқаро фавқулодда ҳолат эълон қилган. Мамлакатда касаллик пайдо бўлганидан буён 2200 киши вафот этган.
Изоҳ (0)