Антарктидада Украинанинг «Академик Вернадский» станцияси атрофида олимлар қор «гуллагани»ни аниқлади — у одатдагидек оқ рангда эмас, балки пушти ва яшил тусга кирган. Бу ҳақда Украина Миллий Антарктида илмий марказига таяниб, «РБК» хабар бермоқда.
«Қорда микроскопик сув ўтлари ўсиши туфайли шундай ранг пайдо бўлади. Улар ўта паст ҳароратга чидамли бўлган споралар билан кўпаяди ва бутун қиш давомида қорда сақланади», — дейилади хабарда.
Қорга хлорофилл пигменти яшил ранг берса, микроскопик сув ўтларининг баъзи турлари таркибига кирувчи каротин уни пушти рангга бўяйди, дея илмий марказ аниқлик киритган.
Олимларнинг сўзларига кўра, қорнинг «гуллаши» иқлим ўзгариши учун имконият яратади, чунки шундай тусга кириши туфайли қор қуёш нурини камроқ акс эттиради ва тезроқ эрийди.
Марказдагиларнинг эслатишича, ўтган йили Антарктидада қорнинг пушти тусга кириши дунё ҳамжамияти эътиборини тортган. Кембриж университети олимлари Украина Миллий Антарктида илмий марказида биргаликда тадқиқот олиб бориб, Антарктида майдонининг қанча қисми рангли қор билан қопланаётганини аниқлашни таклиф қилган.
Эслатиб ўтамиз, 2020 йил баҳорида Кембриж университети ва Британия Антарктика хизмати олимлари, тахминан, икки квадрат километр майдонда деярли 1700 алоҳида сув ўтлари гуллаш ўчоқларини топган эди.
Изоҳ (0)