Ўтган ҳафта охирида АҚШнинг Техас штатига Арктика циклони кириб келди ва мамлакат тарихида илк бора Техаснинг барча 254 шаҳрида кучли қор бўрони бўлиши ҳақида огоҳлантиришлар берилди. Қор бўронларидан ташқари ҳаво ҳарорати ҳам рекорд даражада пасайиб кетди — штатнинг айрим ҳудудларида 1989 йилдан бери илк бор рекорд қайд этилиб, 18 даража совуқ кузатилди, дея хабар берган «Коммерсантъ».
Штатнинг энг катта шаҳарларидан бири бўлга Далласда 14 февраль, якшанба куни 10 даража совуқ иқлим ҳукмронлик қилди, АҚШнинг шимолий штати бўлган Алясканинг Анкорижа шаҳридан (8 даража совуқ) ҳам совуқроқ бўлди.
АҚШ ОАВнинг хабар беришича, Далласда февраль ойида одатда ҳаво ҳарорати 10—15 даража илиқ бўлар эди.
Метеорологлар Техасдаги совуқ об-ҳавони Канададан келган арктик циклон билан боғлиқлигини билдирган. Ҳавонинг кескин пасайиши жанубий штатнинг инфратузилма объектларига зиён етказган, жумладан, кучли шамол, совуқ ҳаво ва қор бўронлари туфайли электр энергияси ва транспорт тизимида муаммолар юзага келган. Техасда ҳавонинг бирданига совиб кетиши ёнилғига бўлган талабнинг ошишига олиб келди. WТИ (West Texas Intermediate) маркасидаги нефть нархи 2 фоизга ошди ва баррель учун 60,6 долларга баҳоланди, бу 2020 йил январидан бери мазкур нефть тури учун белгиланган энг қиммат нарх ҳисобланади.
Argus экспертларининг қайд этишича, Brent маркасидаги нефтнинг котировкалари 2,1 фоизга кўтарилган ва охирги 13 ой ичидаги энг юқори чўққи — 63,76 долларга чиққан. Мутахассисларнинг таъкидлашича, нефть нархи нафақат АҚШдаги совуқ об-ҳаво, балки COVID-19 пандемиясидан кейин жаҳон иқтисодиётининг аста-секин тикланишни бошлагани учун ҳам кўтарилган. Шунингдек, ОПЕК иттифоқига кирувчи давлатнинг нефть ишлаб чиқаришни камайтиргани ҳам нархларнинг кўтарилишига туртки бергани тахмин қилинмоқда.
Аввал Истанбулда кучли қор ёғиши туфайли барча ўқув муассасалари ёпилгани, Германияда совуқ ҳаво ва қор ёғиш бўйича янги рекорд қайд этилгани ҳақида хабарлар берилган.
Мавзуга доир: Фото: Икки кун тинимсиз ёғган қор остида қолган Москва
Изоҳ (0)