АҚШ Конгресси вакиллар палатаси спикери Нэнси Пелоси январь ойида Капитолийга уюштирилган ҳужумни текшириш учун мустақил комиссия тузилганини эълон қилди. Бу ҳақда «РБК» хабар берди.
«Комиссия 2021 йил 6 январда АҚШнинг Капитолий мажмуасида содир этилган ички террористик ҳужум ва ҳокимиятнинг тинч йўл билан топширилишига халақит бериш билан боғлиқ фактлар ва сабабларни текшириб, улар ҳақида маълумот беради», — дейилади хабарда.
Пелосининг сўзларига кўра, собиқ президент Дональд Трампга нисбатан импичмент жараёни ва Капитолий хавфсизлигини текшириш сўралган истеъфодаги генерал-лейтенант Рассел Оноренинг хулосалари Конгресс томонидан комиссия тузилишига туртки бўлган. «Воқеа қандай содир бўлгани тўғрисида бор ҳақиқатни билишимиз зарурлигини англадик» — қўшимча қилди Пелоси.
Спикер, шунингдек, Конгрессни ҳимоя қилиш учун қўшимча маблағ ажратиш зарурлигини маълум қилди.
6 январь куни президент сайлови натижаларидан норози бўлган Трамп тарафдорлари Вашингтонда уни қўллаб-қувватлаб митинг ўтказгач Капитолий биносига шиддатли ҳужум уюштирган эди. Оқибатда бинога зарар етказилган, беш киши ҳалок бўлган (улар орасида бир полициячи бор), камида 60 киши жабрланган.
Шундан кейин Америка Конгресси аъзолари, шу жумладан, бир нечта республикачилар ҳам Трампни тартибсизликларга даъват қилишда айблаб, унга импичмент эълон қилишга чақирган. У АҚШ тарихида икки марта импичмент эълон қилинган биринчи президент бўлди.
Трампнинг ўзи эса исёнчилар ҳужумини қоралаб, «мамлакатда зўравонлик ва вандализмга ўрин йўқ»лигини айтган.
Трампга нисбатан импичментни кўриб чиқиш 9 февраль куни бошланди. 13 февраль куни кечқурун ҳимоя ва айблов томонлари жараённи чўзмаслик учун гувоҳларни сўроқ қилмасликка қарор қилди. АҚШ Сенати Трампни импичмент иши бўйича оқлади.
Собиқ давлат раҳбарига нисбатан қўзғолонга даъват қилганлик айбловини ёқлаб Конгресс юқори палатасининг 57 нафар аъзоси овоз берди, 43 сенатор қарши чиқди. Импичментни тасдиқлаш учун камида 67 киши ёқлаб овоз бериши керак эди.
Агар Трамп айбдор деб топилганида, у бошқа ҳеч қачон президент лавозимига даъвогарлик қила олмаган бўларди.
Изоҳ (0)