Бутун дунёда COVID-19’га чалиниш бўйича янги ҳолатлар сони кетма-кет бешинчи ҳафта камайиб бормоқда. Бу ҳақда Жаҳон соғлиқни сақлаш ташкилоти (ЖССТ) бош директори Тедрос Гебрейесуснинг баёнотига таяниб, «РБК» хабар берди.
«Октябрдан бери ўтган ҳафта илк маротаба ҳафталик инфекция юқтириш ҳолати бўйича энг паст кўрсаткич қайд этилди», — деди Гебрейесус. Унинг сўзларига кўра, беш ҳафта ичида вирус юқтириш ҳолати деярли икки бараварга камайган.
Февраль ойи бошида Гебрейесус мутацияларни ҳисобга олган ҳолда инфекция юқтириш бўйича янги ҳолатлар сонининг камайиши пандемия тарқалишини бошқаришга имкон беришини айтганди.
Олдинроқ ЖССТ мутахассиси Мария ван Керкховен коронавирус тарқалиш суръати пасайганини эълон қилганди. Шу билан бирга, у инфекциянинг олдини олиш чораларига риоя қилишда давом этиш зарур деб ҳисоблайди. «Касалликнинг пасайиши бир қатор омилларга, биринчи навбатда, мамлакатларнинг вирус юқиш занжирини узиши ҳамда инфекция тарқалишининг олдини олиш учун фойдаланадиган чоралари билан боғлиқ», — деган у.
Январь ойида ЖССТ соғлиқни сақлаш бўйича фавқулодда вазиятлар дастури директори Майкл Райан коронавирусни тўлиқ мағлуб этиш қийин бўлишини айтган. У COVID-19 эндемик касалликка айланишини истисно қилмаган, унинг фикрича, вирусни бутунлай йўқ қилиш деярли имконсиз.
Шунингдек, ташкилотнинг Россиядаги вакили Мелита Вуйнович COVID-19 вируси Ер сайёрасида абадий қолиши мумкинлиги, юқори самарали вакцина уни бутунлай йўқ қилиш учун кафолат бермаслигини айтган.
Аввалроқ Қўшма Штатларда COVID-19’га чалиниш ҳолати ва унинг оқибатида касалхонага ётқизилаётганлар сони камайгани ҳақида хабар қилинганди. Мамлакатда қурбонлар сони кўпайишда давом этса-да, ўлим даражаси секинлашмоқда.
Исроилда эса коронавируснинг «британча» мутацияси тарқалиши орқали болалар орасида вирусга чалиниш ҳолати икки ярим бараварга ошган. Бу эса Исроилнинг йирик клиник марказларида ихтисослашган педиатрик COVID реанимация бўлимлари очилишини талаб қилмоқда.
Изоҳ (0)