Трамп тарафдорлари орасида оммалашган Parler ижтимоий тармоғи фаолиятини қайта тиклади

АҚШнинг собиқ президенти Дональд Трамп тарафдорлари орасида оммалашган ҳамда 6 январь кунги Вашингтондаги тартибсизликлар туфайли Apple, Google ва Amazon компаниялари томонидан блокланган Parler ижтимоий тармоғи яна иш бошлади. Бу ҳақда «РБК» хабар берди.

«Parlerни тажрибали жамоа бошқаради ва биз уни тарк этмоқчи эмасмиз... Тармоқ сўз эркинлиги, шахсий ҳаёт дахлсизлиги ва фуқаролик мулоқотига содиқ қолган етакчи ижтимоий медиа платформаси сифатида ривожланади», — деди компаниянинг вақтинчалик бош директори Марк Меклер.

Меклернинг аниқлик киритишича, хизмат АҚШнинг ахборот технологиялари соҳасидаги етакчи компанияларига боғлиқ бўлмаган серверларда ўз фаолиятини давом эттирган. Улар орасида Google’га эгалик қилувчи Alphabet, Amazon, Facebook, Microsoft ва Apple компаниялари бор.

Бунгача Amazon Parler’га хостинг хизматларини кўрсатган, аммо Вашингтондаги тартибсизликлар ортидан компания ижтимоий тармоқни ўз серверларидан узиб қўйган. Amazon Parler’га тармоқда «зўравонликка ундовчи» 98 та пост топилганини айтган ва чеклов йўқлиги туфайли ижтимоий тармоқдаги бундай таркиб ҳажми ўсиб бораётганини таъкидлаган. Серверлардан узилгандан сўнг, Parler тармоқни «сиёсий руҳда» ўчиргани учун Amazon’ни судга берди, аммо суд даъвони рад этди.

«Сайт ушбу ҳафта давомида фақат аввалги фойдаланувчилар учун очиқ бўлади, янги фойдаланувчилар эса кейинги ҳафта рўйхатдан ўтиши мумкин», — деди Меклер. Parler ўзининг веб-хости сифатида Amazon ўрнини қайси компания эгаллаганига аниқлик киритмади. Компания маълумотларига кўра, Parler сайтдаги фаолиятини қайта тиклайди. Дастур ҳали Google Play Store ва App Store’га қайта жойлаштирилмаган.

Маълумот учун, Parler 2018 йилда ташкил этилган ва цензурасиз Twitter сифатида танилган. АҚШдаги 2020 йилги президентлик сайловларидан сўнг, у америкалик ўнг қанот фаоллар орасида машҳурликка эришган ва бир мунча вақт Америка App Store’да энг кўп юклаб олинган дастур бўлган.

6 январь куни АҚШнинг ўша пайтда амалда бўлган президенти Дональд Трампнинг тарафдорлари Капитолийга бостириб киргандан сўнг, Apple ва Google Parler’ни ўзларининг дўконларидан олиб ташлаган. Ижтимоий тармоқлар учун хостинг хизматларини кўрсатувчи Amazon ўз серверларидан Parler’ни узишини эълон қилган.

Parler кенгаши 29 январь куни тармоқнинг ижрочи директори Жон Мацени компаниядан ҳайдаган.