Сўнгги йилларда оғир ҳолатда қолиб кетган ва кенг миқёсдаги ислоҳотларга муҳтож бўлган Жаҳон савдо ташкилоти (ЖСТ) янги бош директорни танлади. Нигерия вакили Нгози Оконжо-Ивеала ташкилотнинг янги раҳбарига айланди. У ушбу лавозимда иш бошлайдиган энг биринчи аёл раҳбар бўлади, деб ёзмоқда «Интерфакс».
ЖСТ бош кенгаши 15 февраль куни навбатдан ташқари йиғилишида Оконжо-Ивеала номзодини бош директорликка маъқуллаган. Аёл 2021 йил 1 мартдан ўз лавозимида иш бошлайди ва 2025 йил 31 августга қадар бош директор сифатида ишлаши мумкин.
ЖСТнинг аввалги раҳбари Роберту Азеведу 2020 йил 31 августида лавозимини тарк этган ва шахсий сабаблар туфайли учинчи муддатга қолмасликка қарор қилганди. У ЖСТда 2013 йил сентябрдан раҳбарлик қилган ва унинг иккинчи тўрт йиллик муддати 2017 йил сентябрда бошланганди.
Аввал ЖСТ бош директори лавозимига саккизта давлат – Буюк Британия, Миср, Корея, Мексика, Молдова, Нигерия ва Саудия Арабистонидан номзодлар таклиф қилинган, кейинчалик бешта номзод қолган ва якуний босқичга икки киши «етиб келган»ди.
2020 йил октябрь ойи охирида Оконжо-Ивеала ЖСТ қошидаги ҳамраисларнинг овоз бериш жараёнида Корея вакили Ю Мён Хини (АҚШ Ивеаланинг номзодига вето қўйганди) ортда қолдирган. Тайинловда ўзаро келишув талаб этилгани сабабли мамлакатлар ўртасидаги маслаҳатлашувлар узоқ давом этган ва АҚШда янги президент сайланганидан кейин бу борада бир тўхтамга келинган.
5 февралда Жанубий Корея вакили ЖСТ бош директорлиги учун курашдан чиқди ва ўз номзодини олди, АҚШнинг савдо вакиллиги эса Нгози Оконжо-Ивеалани қўллаб-қувватлашини билдирди.
Оконжо-Ивеала 1954 йилда туғилган, фаолияти давомида молия вазири, шунингдек, Нигерия ташқи ишлар вазири лавозимларида ишлаган. 25 йиллик фаолиятида Жаҳон банкида турли раҳбарлик лавозимларида, хусусан, бошқарув директори сифатида иш олиб борган (банкда лавозим даражаси бўйича иккинчи раҳбар). Шунингдек, у икки марта Жаҳон банки президентлиги учун ўз номзодини қўйган.
Мавзуга доир: 2021 йилда жаҳон иқтисодиётини нималар кутмоқда?
«Баҳсларни ҳал этиш тизими ҳар доим ҳам самара бера олмаяпти, бу йўналиш ҳам таъмирга муҳтож ҳолатда. Бундан ташқари АҚШнинг аппеляцион орган ишини блоклаши ташкилотнинг фақат бир бўғинда ишлашига хизмат қилмоқда», – дейди ЖСТ бўйича эксперт.
Изоҳ (0)