AQShda Kapitoliyga hujum yuzasidan tekshiruv o‘tkazish uchun komissiya tuzildi

AQSh Kongressi vakillar palatasi spikeri Nensi Pelosi yanvar oyida Kapitoliyga uyushtirilgan hujumni tekshirish uchun mustaqil komissiya tuzilganini e’lon qildi. Bu haqda “RBK” xabar berdi.

“Komissiya 2021-yil 6-yanvarda AQShning Kapitoliy majmuasida sodir etilgan ichki terroristik hujum va hokimiyatning tinch yo‘l bilan topshirilishiga xalaqit berish bilan bog‘liq faktlar va sabablarni tekshirib, ular haqida ma’lumot beradi”, — deyiladi xabarda.

Pelosining so‘zlariga ko‘ra, sobiq prezident Donald Trampga nisbatan impichment jarayoni va Kapitoliy xavfsizligini tekshirish so‘ralgan iste’fodagi general-leytenant Rassel Onorening xulosalari Kongress tomonidan komissiya tuzilishiga turtki bo‘lgan. “Voqea qanday sodir bo‘lgani to‘g‘risida bor haqiqatni bilishimiz zarurligini angladik” — qo‘shimcha qildi Pelosi.

Spiker, shuningdek, Kongressni himoya qilish uchun qo‘shimcha mablag‘ ajratish zarurligini ma’lum qildi.

6-yanvar kuni prezident saylovi natijalaridan norozi bo‘lgan Tramp tarafdorlari Vashingtonda uni qo‘llab-quvvatlab miting o‘tkazgach Kapitoliy binosiga shiddatli hujum uyushtirgan edi. Oqibatda binoga zarar yetkazilgan, besh kishi halok bo‘lgan (ular orasida bir politsiyachi bor), kamida 60 kishi jabrlangan.

Shundan keyin Amerika Kongressi a’zolari, shu jumladan, bir nechta respublikachilar ham Trampni tartibsizliklarga da’vat qilishda ayblab, unga impichment e’lon qilishga chaqirgan. U AQSh tarixida ikki marta impichment e’lon qilingan birinchi prezident bo‘ldi.

Trampning o‘zi esa isyonchilar hujumini qoralab, “mamlakatda zo‘ravonlik va vandalizmga o‘rin yo‘q”ligini aytgan.

Trampga nisbatan impichmentni ko‘rib chiqish 9-fevral kuni boshlandi. 13-fevral kuni kechqurun himoya va ayblov tomonlari jarayonni cho‘zmaslik uchun guvohlarni so‘roq qilmaslikka qaror qildi. AQSh Senati Trampni impichment ishi bo‘yicha oqladi.

Sobiq davlat rahbariga nisbatan qo‘zg‘olonga da’vat qilganlik ayblovini yoqlab Kongress yuqori palatasining 57 nafar a’zosi ovoz berdi, 43 senator qarshi chiqdi. Impichmentni tasdiqlash uchun kamida 67 kishi yoqlab ovoz berishi kerak edi.

Agar Tramp aybdor deb topilganida, u boshqa hech qachon prezident lavozimiga da’vogarlik qila olmagan bo‘lardi.