Анъанавий ҳафталик дайжестимизни эътиборингизга ҳавола этамиз.
Об-ҳаво инжиқликлари
Ўтган ҳафтада Европанинг бир қатор давлатларида совуқ ҳаво ҳарорати ва кучли қор ёғиши кузатилди. Жумладан, Германияда бу борадаги рекорд қайд этилди. Германия 2021 йил февраль ойида совуқ ҳаво ва қор ёғиши бўйича ўз рекордларини янгилади. Мамлакатнинг Мюлхаузен шаҳрида 10 февраль, чоршанба куни кечаси 26,7 даража совуқ ҳаво қайд этилди.
Умуман олганда, Германияда бир неча кундан бери қор ёғмоқда, синоптикларнинг фикрига кўра, совуқ ҳарорат камида шу ҳафта охиригача давом этади.
Германиялик метеоролог Доминик Юнгнинг сўзларига кўра, бундай қорли ва совуқ февраль охирги марта 9 йил олдин кузатилган.
Берлиндаги қор камдан-кам учрайдиган чана учиш имкониятини бериш орқали болаларни қувонтирса-да, бошқаларга ноқулайлик туғдирмоқда, чунки шаҳарда қор тозаловчи йирик ускуналар йўқ.
Мазкур ҳолатдан темир йўл транспорти ҳам азият чекмоқда — қор ёғиши сабабли шаҳарлараро қатновчи S-Bahn поезди транспорт ҳаракатидаги янги узилишлар, поезд рейсларининг кечикиши ва бекор қилиниши ҳақида хабар берди.
7 февраль куни Германия ҳукумати кучли қор ёғиши туфайли Нидерландия билан ўта тезюрар Intercity (ICE) поездлар қатновини бекор қилишга мажбур бўлганди. Шимолий Рейн-Вестфалия штатининг ўзида ноқулай об-ҳаво туфайли 222 та йўл-транспорт ҳодисаси юз берган. Уларда 28 киши жабрланган.
Эслатиб ўтамиз, Германиядаги Рейн дарёси қор эриши туфайли тошиб кетган.
Бундай ҳаво ҳарорати доимий бўладиган Москвада ҳам икки кун тинмай қор ёғган. Москвада 2021 йил 12 февраль куни тунда кучли қор ёға бошлаган. Қор ёғиши 13 февраль, шанба куни кечасигача давом этган. Бу вақт давомида шаҳардаги ёғингарчилик миқдори 24 миллиметрни ташкил қилган. Бу февраль ойидаги меъёрнинг 60 фоизи демакдир.
Шаҳар кўчаларида 12 февраль, жума оқшомида катта тирбандликлар кузатилган. Ҳатто тунда ҳам тирбандликлар тарқалмаган. 13 февраль куни эрталаб тирбандликлар яна давом этган. Шаҳар ҳокимияти Москвани тўлиқ тозалаш учун 8 кун кераклигини маълум қилди.
Японияда кучли зилзила
Ўтган ҳафтада Япониянинг шимоли-шарқида 7,1 магнитудали зилзила содир бўлди. Зилзиланинг эпицентри Тинч океанида, Фукусима префектураси ҳудудида экани маълум қилинди. Силкинишларнинг максимал кучи 7 балли Япония шкаласида 6+ баллни ташкил қилган.
Ер силкиниши Токиода ҳам сезилган, мамлакат пойтахтида, тахминан, 4 балли зилзила кузатилган. Сунами хавфи йўқ. Қурбонлар ва вайрон бўлган бинолар ҳақида ҳам ҳозирча маълумотлар мавжуд эмас, зилзила оқибатида икки нафар одамга талафот етган. Кейинчалик Kiodo агентлиги жароҳатланганлар сони йигирма нафарга етганини хабар қилди.
Зилзиладан кейин Токионинг саккизта префектурасида жами 835 та хонадон электр таъминотидан узилиб қолган.
Ҳафта охирида олинган маълумотларга кўра, ҳалокат оқибатида жабрланганлар сони 100 нафардан ошган. Маълумотларга кўра, Фукусима, Мияги префектуралари ва бошқа бир қанча ҳудудлар аҳолиси жабр кўрган. Ҳалок бўлганлар ҳақида маълумот йўқ. Шунингдек, зилзила оқибатида 900 мингга яқин уй электр қувватисиз қолган. Эрталабга келиб муаммо ҳал қилинган, айни пайтда Фукусимадаги бир неча юзта бино чироқсиз қолмоқда, холос.
Шошилинч хизматлар хабарига кўра, зилзиладан Фукусима, Мияги, Ибараки, Тотиги, Сайтама, Тиба, Канагава ва Гумма префектураларида 104 киши жабрланган. Уларнинг кўпчилиги йиқилиб тушиш оқибатида шикастланган.
Оқланган Трамп
АҚШ Сенати собиқ президент Дональд Трампнинг импичментига қарши овоз берди. Жараён CNBC телеканали ва Американинг бошқа ОАВлари орқали трансляция қилинди.
Собиқ давлат раҳбарига нисбатан қўзғалонга даъват қилганлик айбловини ёқлаб Конгресс юқори палатасининг 57 нафар аъзоси овоз берди. 43 сенатор қарши чиқди. Импичментни тасдиқлаш учун камида 67 киши ёқлаб овоз бериши керак эди.
Трампга нисбатан импичментни кўриб чиқиш 9 февраль, сешанба куни бошланди. 13 февраль куни кечқурун ҳимоя ва айблов томонлари жараённи чўзмаслик учун гувоҳларни сўроқ қилмасликка қарор қилди. Якуний далиллар учун томонларга ажратилган тўрт соатдан икки соатга яқини керак бўлди.
Бунгача Демократик партиядан сенаторлар гувоҳларни чақиришни таклиф қилди, аммо бу Трамп ҳимоясининг салбий муносабатига сабаб бўлди ва улар ҳам ўз гувоҳларини чақиришни талаб қилди. Бунинг ўрнига ишга конгрессвумен Жейми Херрера Батлер ва исмлари ошкор қилинмаган шахсларнинг ёзма аризаларини аралаштиришди.
Трампнинг ўзи жараёнда қатнашиб, кўрсатма беришдан бош тортди. Собиқ президентни айбловчилар бу Оқ уй собиқ раҳбарининг айбдорлиги фойдасига ҳисобланишини маълум қилди. Унинг ҳимояси импичментни конституцияга зид деб атади, чунки Трамп давлат лавозимини ортиқ эгаллаб тургани йўқ.
Агар Трамп айбдор деб топилганида, у бошқа ҳеч қачон президент лавозимига даъвогарлик қила олмаган бўларди.
Коронаинфо
Бугунга келиб бутун дунё бўйлаб коронавирусга чалинганларнинг умумий сони 109 миллиондан ошди.
Дунё миқёсида COVID-19 туфайли 2,4 миллион бемор вафот этган, беморларнинг 81 миллиондан ортиғи касалликдан фориғ бўлган.
АҚШ касаллик аниқланган ва вафот этганлар сони бўйича етакчилик қилмоқда. Мамлакатда 28 миллиондан ортиқ кишида COVID-19 аниқланган, 490 мингдан ортиқ ўлим қайд этилган. Беморларнинг 18 миллиондан ортиғи тузалган.
Коронавирусга чалинганлар сони бўйича Ҳиндистон иккинчи ўринда қайд этилган. Мамлакатда пандемия бошланганидан буён аниқланган COVID-19 беморлари сони 10,89 миллион кишини ташкил этди. Беморларнинг 155 550 нафари вафот этган, 11 миллионга яқини соғайган.
Учинчи ўринни эса Бразилия банд қилган. Бу ерда пандемия бошидан бери 9 миллион 760 минг нафар одамда касаллик аниқланган. Беморларнинг 237 489 нафари вафот этган, деярли 8,7 миллион нафари шифо топган.
Маълумот учун, дунё бўйлаб вирусга чалинганларнинг умумий сони 17 декабрь куни 74 миллион, 27 декабрь куни 80 миллион, 4 январь куни 85 миллион, 11 январь куни 90 миллион, 18 январь куни 95 миллион, 27 январь куни 100 миллион, 7 февраль куни 105 миллиондан ошганди.
Бундан аввал Буюк Британияда коронавирус билан касалланганлар сони 4 миллион кишидан ошгани, Италияда коронавируснинг янги штамми туфайли чекловлар кучайтирилиши ҳамда Японияда пандемия фонида ёлғизлик вазири лавозими жорий қилингани ҳақида хабар берилганди.
Изоҳ (0)